Kërkesa e gjyqtares së Krujës Enkelejda e Hoxha për zbutje të masës së sigurisë e kthim të pasurisë që i është sekuestruar, është rrëzuar sërish nga Gjykata e Posaçme.
Sipas pretendimeve të ish gjyqtares, lekët e sekuestruara janë pensione dhe kursimet e prindërve dhe u duhen atyre për nevoja jetike.
Në seancë ka qenë e pranishme edhe vetë gjyqtarja e cila mes lotësh ka deklaruar se fëmijët dhe prindërit e saj janë në kufijtë e mbijetesës.
Ndërsa prokurorët kërkuan rrëzimin e kërkesës, gjë që u pranua nga Gjykata e Posaçme.
Kujtojmë se, Prokuroria e Posaçme Kundër Krimit dhe Korrupsionit gjatë muajit shkurt zhvilloi një mega-operacion që çoi në pranga 10 persona, përfshirë gjyqtaren e Krujës Enkelejda Hoxha, dhe zyrtarë të tjerë të këtij institucioni.
Hoxha në bashkëpunim me disa persona të tjerë, po përgatiteshin që të nxirrnin nga burgu Sajmir Petanin. Gjyqtarja Hoxha akuzohet se ka marrë shuma nga 6 mijë deri në 12 mijë euro në këmbim të lirimit e të dënuarve për vrasje. Në skemë u zbulua edhe mjeku kardiolog Edvin Prifti pasi nga përgjimet rezultoi se kishte marrë ryshfet për të operuar në QSUT nënën e sekretares së gjykatës, ndërsa aktualisht është në arrest shtëpie.
