Tifozët brenda ‘Stade de France’ u kënaqën me një shfaqje të vërtetë të dielën në mbrëmje, ndërsa Noah Lyles fitoi medaljen e artë në finalen e 100 metrave për meshkuj.
Pasi u detyrua të priste me durim rezultatin e garës, sprinteri amerikan parakaloi rreth stadiumit pasi u shpall fitues përpara se të binte një kambanë gjigante në festë.
Por pse ndodh kjo? Ja gjithçka që duhet të dini për kambanën dhe pse sportistëve u kërkohet t’i bien asaj në Paris këtë verë.
Çdo fituesi të medaljes së artë në atletikë po i jepet mundësia t’i bjerë kambanës së vendosur në skaj të pistës së vrapimit. I mbishkruar me ‘Paris 2024’, instrumenti i madh do të zhvendoset në katedralen Notre-Dame sapo të mbarojnë Lojërat.
Me punimet e rinovimit të katedrales që vazhdojnë ende pas zjarrit shkatërrues të 2019-ës, ideja është që tingulli i lavdisë olimpike do të dëgjohet përgjithmonë nga Notre-Dame kur kambana të zhvendoset në shtëpinë e saj të përhershme.
Vetëm dy herë kanë rënë kambanat brenda Notre-Dame që nga zjarri; për varrimin e ish-presidentit francez Zhak Shirak atë vit dhe përsëri në 2020, për të kujtuar përvjetorin e parë të fatkeqësisë që shkatërroi një pjesë të madhe të ndërtesës.
“Në një farë mënyre, Paris 2024 po ndihmon për të rindërtuar Notre-Dame”, deklaroi Pierre-Andre Lacout, një menaxher në Stade de France. “Një pjesë e Lojërave dhe shpirti olimpik do të qëndrojnë në Notre-Dame për gjithë jetën”.
Kreu i komitetit organizativ të Paris 2024, Tony Estanguet, e ka përshëndetur gjithashtu vendosjen e kambanës si një mënyrë për të bashkuar mbështetësit për të ndihmuar në festimin e Francës dhe kulturës së saj.
Discussion about this post