A mund të jetojnë njerëzit dhe minjtë së bashku?
Kjo është ajo që drejtuesit e qytetit në Paris po përpiqen të zbulojnë. Kryeqyteti francez, si shumë metropole, ka një problem famëkeq të brejtësve. Kryetarja e bashkisë së Parisit Anne Hidalgo po formon një komitet për të studiuar “bashkëjetesën”- deri në çfarë mase njerëzit dhe brejtësit mund të jetojnë së bashku, kështu tha një nga zëvendësit e saj gjatë një takimi të këshillit të qytetit.
Anne Souyris, nënkryetare e bashkisë së Parisit e ngarkuar për shëndetin publik, njoftoi masën në përgjigje të pyetjeve të Geoffroy Boulard, kreu i qarkut të 17-të të Parisit dhe një anëtar i partisë Republikane të qendrës së djathtë.
Boulard i kishte bërë thirrje qeverisë së qytetit të përshkruante një plan më ambicioz kundër përhapjes së minjve në hapësirat publike.
Ai e ka kritikuar më parë Hidalgon, një anëtar i partisë socialiste të qendrës së majtë, se nuk ka bërë mjaftueshëm për të eliminuar minjtë nga Parisi, përfshirë gjatë grevave në fillim të këtij viti, të cilat panë grumbullimin e mbeturinave në të gjithë qytetin .
“Prania e minjve në sipërfaqe është e dëmshme për cilësinë e jetës së parisienëve,” tha Boulard.
Boulard tha se ai po ngrinte pyetjen e tij pasi hasi në një studim në vazhdim, Projekti Armageddon . Misioni i projektit është të ndihmojë qytetin në menaxhimin e popullsisë së minjve të tij dhe ndër objektivat e tij është luftimi i paragjykimeve ndaj minjve për të ndihmuar parisienët të jetojnë më mirë me ta.
Studimi financohet nga qeveria franceze, megjithëse qyteti i Parisit është partner në projekt.
Souyris shpjegoi se ajo që po studiohej ishte se deri në çfarë mase njerëzit dhe minjtë mund të jetojnë së bashku në një mënyrë që të jetë “më efikase dhe në të njëjtën kohë të sigurojë që të mos jetë e padurueshme për parisienët”.
Ndërsa minjtë mund të përhapin sëmundje, nënkryetari i bashkisë tha se minjtë që diskutoheshin nuk ishin të njëjtët minjtë e zinj që mund të bartin murtajë, por lloje të tjera minjsh që bartin sëmundje si leptospiroza, një sëmundje bakteriale. Souyris theksoi gjithashtu disa nga veprimet e ndërmarra nga qyteti si pjesë e planit të tij kundër minjve të vitit 2017, duke përfshirë investimin në mijëra kosha të rinj plehrash për t’i “bërë minjtë të kthehen nën tokë”.
Souyris më vonë tha në Twitter se minjtë e Parisit nuk paraqesin një rrezik “të rëndësishëm” për shëndetin publik. Ajo shtoi se po i kërkonte Këshillit të Lartë Francez për Shëndetin Publik të peshonte mbi debatin.
“Ne kemi nevojë për këshilla shkencore, jo njoftime politike për shtyp,” tha ajo.
Grupi i të drejtave të kafshëve në Paris Animaux Zoopolis përshëndeti lëvizjen e qytetit.
“Minjtë janë të pranishëm në Paris, si në të gjitha qytetet kryesore franceze, kështu që çështja e bashkëjetesës lind domosdoshmërisht”, thuhet në një deklaratë të grupit.
“Në PAZ, kur flasim për “bashkëjetesë paqësore” me minjtë, nuk nënkuptojmë të jetojmë me ta në shtëpitë dhe banesat tona, por të sigurohemi që këto kafshë të mos vuajnë DHE të mos shqetësohemi. Përsëri, një objektiv shumë i arsyeshëm!”
Burimi: CNN
Discussion about this post