Në një postim në Facebook, në faqen zyrtare, Shoqata e Infermierëve bëri me dije se nga shtatori bluzat e bardha do të jenë të detyruar të paguajnë për parkimin brenda Qendrës Spitalore Universitare “Nënë Tereza”, edhe pse mund të kenë karta aksesi.
Në lidhje me këtë lajm, Gijotina.com kontaktoi me presidentin e Shoqatës së Infermierëve, Elson Jaçaj, i cili thotë se sot u ka ardhur një sms ku u thuhet se nga shtatori parkimi për infermierët do të jetë me pagesë, me një tarifë të reduktuar. Ai gjithashtu thotë se infermierët ndihen të zhgënjyer nga ky vendim, pasi me një rritje të valës së COVID, infermierëve do u duhet të shkojnë në punë edhe kur nuk janë në orar pune në mbështetje të kolegëve, ku kjo përkthehet në një kosto shtesë për ta.
“Sot na kanë ardhur disa sms nga Infermierët e QSUT, ku janë njoftuar që nga shtatori nuk do e kenë më falas parkimin ne QSUT por do kenë një tarifë të reduktuar. Nuk ju është konfirmuar asgjë më shumë se si do veprohet për t’u caktuar tarifa për ta, pasi u është thënë do jetë një tarifë e reduktuar. Ata nuk kanë asnjë informacion as nga drejtoria e QSUT as nga koncesionari që ka parkimin.
Thjesht ata ndihen të zhgënjyer pasi dhe pse po flitet që do ketë një valë të re COVID-i dhe i gjithë personeli duhet të jetë në gatishmëri në çdo kohë, pra ata edhe kur nuk janë në orar pune duhet të shkojnë në punë në mbështetje të kolegëve, kjo do jetë kosto për ta” – u shpreh Elson Jaçaj.
Në përgjigjen e tij, Jaçaj thotë se edhe gjatë kësaj kohe, jo të gjithë infermierët e kanë patur falas, pasi disa prej tyre kanë paguar për parkim, më tej shton se mjekët nuk kanë marrë një sms të tillë. Në përgjigje të këtij vendimi, ai thotë se Shoqata e Infermierëve do t’i dërgoj një shkresë QSUT dhe Ministrisë së Shëndetësisë që do jemi në krah të infermierëve duke ndjekur hapat ligjor, ku nuk përjashtohet edhe mundësia e bojkotimit të punës.
Kërkesë do t’u dërgohet edhe sindikatave përkatëse të shëndetësisë të reagojnë për këtë gjë, pasi sipas Jaçajt, prej vitesh këto sindikata thjesht krijohen dhe asgjë nuk bëjnë.
“Mjekët me sa jemi vënë në dijeni nuk kanë marrë një sms të tillë. Pasi kontaktuam disa prej tyre dhe thanë që nuk janë informuar për një gjë të tillë, gjë e cila ka ndodh dhe me koncesionarët e tjerë ku vetëm kategoria e Infermierëve ka qenë e penalizuar të paguaj dhe jo mjekët. Ne sot jemi duke marr informacion nga personeli pasi na thanë që edhe kësaj kohe ku ka qenë falas për infermieret, jo të gjithë e kanë pas falas, pra dhe këto kohë nuk ka qenë falas për të gjithë Infermierët. Ne po marrim info për çfarë po ndodh dhe këto ditë do t’i dërgojmë një shkresë QSUT dhe Ministrisë së Shëndetësisë në lidhje me këtë vendim dhe sigurisht që do jemi në krah të Infermierëve në çdo formë për zgjidhjen e kësaj, duke ndjekur hapat ligjor dhe deri dhe në bojkot të punës pasi nuk është e vetmja padrejtësi që ndodh në drejtim të Infermierëve në Shqipëri. Do t’i kërkojmë dhe Sindikatave përkatëse të Shëndetësisë të reagojnë për këtë gjë pasi prej vitesh këto Sindikata thjesht krijohen dhe asgjë nuk bëjnë” – shton më tej kreu i Shoqatës së Infermierëve për Gijotina.com.
