Presidenti i Republikës Ilir Meta ka dalë sot para mediave për të folur për çështjen e Butrintit. Meta tha se është e papranueshme logjika që për pasuri të tilla si Butrinti, me rëndësi historike, shteti të heqë dorë nga çdo përgjegjësi.
Ai bëri apel për që kjo çështje të marrë kohën e nevojshme dhe të trajtohet me kujdesin maksimal nga Kuvendi i Shqipërisë.
“Parku Kombëtar i Butrintit është një pasuri e paluajtshme e regjistruar në listën botërore të UNESCO-s. Sipas konventës së Parisit, përgjegjësia mbi këto objekte nuk mund të kalojë në OJF, por mbetet te shteti. Shteti nëse do të aplikojë këtë formë të re administrimi nëpërmjet një fondacioni, duhet të ruante rolin e tij. Presidenti i Republikës nuk është kundër formave të bashkëpunimit shtet-privat, aq më pak me Fondin Shqiptaro Amerikan, por është e papranueshme logjika që për pasuri të tilla si Butrinti, me rëndësi historike, shteti të heqë dorë nga çdo përgjegjësi. Nëse qeveria sot deklaron sot mosgarantimin në perspektivë të vlerave si mund ta garantojë atë me një pjesëmarrje në një fondacion ku rolin dhe vendimmarrjen e ka të kufizuar. Kjo çështje duhet të marrë kohën e nevojshme dhe të trajtohet me kujdesin maksimal nga Kuvendi i Shqipërisë”, tha Meta.
Kujtojmë që Meta një ditë më parë ktheu për rishqyrtim në Kuvend, Marrëveshjen për Administrimin e Parkut të Butrintit e gjithashtu iu drejtua me kërkesë Kuvendit për ngritjen e një Komision i Posaçëm parlamentar për Parkun Kombëtar të Butrintit.
Discussion about this post