Me 155 vota pro dhe 115 kundër, dhoma e Ulët e Parlamentit italian ka miratuar marrëveshjen Rama-Meloni mbi ngritjen e kampeve të refugjatëve në Shëngjin të Lezhës.
Mbi marrëveshjen e nënshkruar më 6 nëntor në Romë kanë abstenuar 2 deputetë. Tashmë i takon Senatit italian për tu shprehur nëse e miraton ose jo marrëveshjen në fjalë, në një kohë kur në Shqipëri, ajo është depozituar në Gjykatën Kushtetuese, e cila ka marrë në shqyrtim ankesën e 30 deputetëve të opozitës, që e cilësojnë atë si anti-Kushtetuese.
Marrëveshja parashikon ngritjen e një kompleksi për pritjen e jo më shumë se 3 mijë emigrantëve. Kompleksi përfshin një zyrë regjistrimi në Portin e Shëngjinit, ku mbërrijnë emigrantët që shpëtohen në ujërat mesdhetarë përballë brigjeve italiane dhe akomodimin e tyre në kampin që do të ngrihet në ish-bazën ushtarake ajrore të Gjadrit ku ata do të strehohen gjatë periudhës së kryerjes së procedurave, ku vlerësohet nëse plotësojnë apo jo kriteret për të përfituar azil në Itali.
Administrimi i qendrës do të kryhet plotësisht nga qeveria italiane, ndërsa pala shqiptare është përgjegjëse vetëm për sigurinë e jashtme. Ndërtimi i strukturave nis që këtë vit, ndërsa funksionimi zgjat për 4 vite duke nisur nga 2025-a. Miratimin përfundimtar, marrëveshjes pritet tashmë t’ia japë edhe senati italian.
Discussion about this post