Një përplasje politike ka shpërthyer në Kuvend pas vendimit të Kryetarit të Kuvendit, Niko Peleshi, për të mos përfshirë opozitën në shqyrtimin e çështjes së mandateve të anëtarëve të Gjykatës Kushtetuese.
Vendimi ka sjellë një reagim të ashpër nga kreu i Grupit Parlamentar të Partisë Demokratike, Gazment Bardhi, i cili e akuzon Peleshin për përjashtimin e qëllimshëm të opozitës nga një proces që, sipas tij, prek drejtpërdrejt rendin kushtetues dhe kërkon trajtim institucional gjithëpërfshirës.
“Niko Peleshi vendos që opozita nuk ka të drejtë as të japë mendim, as opinion, e as të mbajë qëndrim institucional për çështje që lidhen me rendin kushtetues. Askush përpara tij nuk ka guxuar të shkojë në këto nivele”, – deklaroi Bardhi.
Ai e krahasoi veprimin e Peleshit me një kthim në logjikën e partisë-shtet, duke theksuar se çështjet kushtetuese nuk mund të trajtohen si interes partiak. Bardhi kritikoi gjithashtu refuzimin për të lejuar opozitën të shprehet me shkrim në një proces që zhvillohet pa seancë publike në Gjykatën Kushtetuese.
“Kryetari i Kuvendit vazhdon të firmosë ‘idiotësira shtetërore’, pa kuptuar për çfarë e hedh firmën dhe aq më pak për çfarë përdor vulën e institucionit më të lartë të shtetit”, – shtoi ai.
Bardhi theksoi se në raste të mëparshme, drejtuesit e Kuvendit kanë përfshirë opozitën në vendimmarrje të ngjashme, duke respektuar parimin e përfaqësimit të të gjithë Kuvendit në çështje që prekin balancën institucionale dhe pavarësinë e drejtësisë.
Opozita kërkon që procesi për shqyrtimin e mandateve të anëtarëve të Gjykatës Kushtetuese të trajtohet në mënyrë transparente dhe me pjesëmarrjen e të gjitha palëve parlamentare.
Discussion about this post