Erion Braçe ka deklaruar se nuk ka zhvilluar asnjë bisedë me kryeministrin Edi Rama lidhur me kandidimin e tij për drejtimin e Bashkisë së Tiranës.
Përmes një postimi në rrjetet sociale, Braçe thotë se Partia Socialiste duhet të rikthehet te proceset demokratike të zgjedhjes së përfaqësuesve përmes votës së anëtarësisë.
Sipas tij, parimi i garës dhe votës brenda PS-së ka humbur prej vitesh dhe është zëvendësuar me vendime të njëanshme dhe njoftime të bëra “nga njerëz të pavotuar dhe të pavotueshëm”.
Braçe sqaron gjithashtu se nuk është “nxjerrë” nga Rama për të kandiduar dhe se çdo vendim i tij politik bazohet në parime dhe jo në marrëveshje personale apo interesa të momentit.
Ai shton se qëllimi i tij është përmirësimi i shërbimeve dhe qeverisjes në Tiranë, duke theksuar nevojën për rikthimin e funksionimit institucional dhe transparencës në vendimmarrje.
Tirana 💜 e të gjithëve
Përgjigje për të gjitha aludimet e dy javëve të fundit:
Nuk kam folur me Edi Rama për kandidimin tim.
Nuk më ka nxjerrë Edi Rama të kandidoj.
Interesi im janë parimet, çështjet e lidhura me to dhe shërbimi ndaj qytetit, jo sulmi ndaj kujtdo.
E përsëris: unë nuk luaj dhe nuk tallem me askënd, as me qytetin dhe as me popullin e tij.
Nuk kam folur me Edi Rama për kandidimin tim. Kjo nuk është mungesë respekti; përkundrazi, është respekt ndaj rolit të tij si kryetar i PS, i pari mes të barabartëve në një parti që duhet të zgjedhë me votë të anëtarëve, simpatizantëve dhe të majtëve në tërësi, përfaqësuesit dhe drejtimin që duan të ndjekin. Janë parime të gushtit 2005 që bëjnë diferencën dhe unë i qëndroj atyre, veçanërisht kur prej kohësh gara, merita dhe vota janë zëvendësuar me njoftime të kryera, që kanë sjellë njerëz të pa votuar dhe të pavotueshëm në role drejtuese.
Nuk më ka nxjerrë Edi Rama të kandidoj, as për nevojat e tij, të PS në këtë moment apo të miat si nder apo qokë, dhe as për të larguar në këtë mënyrë Ogerta Manastirliu nga kjo garë. Kush më njeh e di mirë se, nëse këto do të ishin arsyet, do të isha i pari që do të refuzoja, siç kam bërë edhe më parë. Mendimin për të kandiduar e kam shprehur qartë në mbledhjen e Asamblesë së PS të Njësisë 5, pra brenda strukturave të PS dhe jo jashtë tyre. Ka qenë një vendim i menduar mirë dhe një përgjigje për mijëra qytetarë të këtij qyteti që kam takuar në lagjet dhe rrugët e tij, si dhe për shumë socialistë me të cilët e kam diskutuar këtë hap. Kam kërkuar një proces të gjerë, përfshirës dhe demokratik, jo një favor apo qokë karriere.
Nuk është sulm dhe nuk kam ndërmend të sulmoj Edi Rama për këtë. Në këto vite në politikë dhe shërbim publik nuk merrem me individin, por me parimet dhe çështjet që lidhen me mënyrën se si ato zbatohen dhe ndikojnë në jetën e njerëzve. I jam përgjigjur nevojave të këtij qyteti prej një viti, madje edhe më herët në mënyrë sporadike. Sot situata është më e rëndë: ky qytet as nuk po vetëqeveriset dhe as nuk po qeveriset prej një viti. Është në rënie në shumë aspekte, sidomos në drejtim të ligjit, rendit dhe shërbimeve për qytetarët. Ky është shqetësimi im dhe kjo është ajo që dua të përball. Synimi im është reformimi i plotë i proceseve dhe rikthimi i shërbimeve më të mira, për ta bërë qytetin e të gjithëve, jo vetëm të atyre që përfitojnë. Qëllimi im është t’i kthej qytetit punën që meriton në krye të tij, jo sulmin ndaj kujtdo. Ashtu siç po bëj çdo ditë në Njësinë 5, ku qytetarët nuk e kishin ndjerë praninë e deputetit prej katër vitesh, po ashtu do të jem një punëtor i parë për qytetin dhe popullin e tij.
gijotina.com/
Discussion about this post