Zëvendëssekretarja e Përgjithshme e Partisë së Lirisë, Brunilda Haxhiu, ka reaguar ashpër ndaj gjendjes në sektorin e arsimit, duke akuzuar qeverinë dhe Ministrinë e Arsimit për propagandë dhe manipulim të realitetit.
Në një deklaratë publike, Haxhiu theksoi se “cilësia e dobët në shkolla, pagat e ulëta dhe kushtet e vështira të punës për mësuesit po maskohen me rezultate të stisura dhe përdorim të njëanshëm të raportit ndërkombëtar TALIS”.
Sipas saj, arsimi është kthyer në një nga sektorët më të neglizhuar dhe më pak tërheqës për të rinjtë. “Sot, mësuesia është një ndër degët më pak të zgjedhura. Të rinjtë nuk e shohin më si një profesion me të ardhme dhe dinjitet”, u shpreh Haxhiu, duke shtuar se qeveria po orienton individë jashtë ciklit normal universitar për të mbushur boshllëqet dhe shmangur mbylljen e degëve të mësuesisë.
Ajo theksoi se raporti TALIS evidenton qartë problemet në terren: nivele të larta stresi, mungesë mbështetjeje, trajnime formale e jo praktike dhe vlerësim të dobët profesional.
“Qeveria krenohet me statistika, ndërsa realiteti është i hidhur: mungesë mësuesish, shpopullim, kushte të vështira dhe një sistem që po humb profesionistët më të mirë”, tha Haxhiu.
Në përfundim, ajo theksoi se “arsimi nuk përmirësohet me deklarata dhe foto propagandistike, por me respekt për mësuesin, politika të qëndrueshme dhe paga dinjitoze”.
Sipas saj, Shqipërisë nuk i mungojnë mësuesit e përkushtuar, por një strategji kombëtare për të nxjerrë arsimin nga kriza.
Discussion about this post