Pas nisjes së hetimeve nga ana e SPAK për ish-presidentin Ilir Meta, Partia e Lirisë nuk ka ndalur reagimet ndaj Prokurorisë së Posaçme. Kësaj radhe ka reaguar sekretari i Përgjithshëm i PL, Tedi Blushi, i cili në një postim në Facebook, thekson se Partia e Lirisë është e vendosur për të ndihmuar dhe inkurajuar çdo ditë SPAK-un. Ai i ka bërë thirrje kryeministrit Rama që të heq dorë nga cilësimet e SPAK, si krijesë të PS, pasi sipas tij janë shantazhe që kompromentojnë funksionimin e drejtësisë së pavarur.
“Mbështetim të gjitha thirrjet që dënojnë sulmet dhe presionet banale politike të Edi Ramës ndaj SPAK dhe Drejtësisë. Partia e Lirisë është e vendosur për të ndihmuar dhe inkurajuar çdo ditë SPAK, siç po vepron, duke e furnizuar me prova të pakundërshtueshme dhe dokumente origjinalë që provojnë botërisht vjedhjet e tmerrshme të Edi Ramës dhe bandës së tij, kryesisht nëpërmjet aferës së inceneratorëve. Partia e Lirisë pret me durim që SPAK të veprojë pa vonesë ndaj kallëzimeve penale dhe që abuzuesit me taksat e shqiptarëve të marrin menjëherë ndëshkimin e merituar dhe të shumëpritur nga populli shqiptar. I bëjmë thirrje Edi Ramës të heqë dorë nga cilësimet e SPAK, si krijesë të PS, siç bëri në Kongresin e Partisë së 9 majit kur tha ndër të tjera se: “SPAK-u nuk do ekzistonte po të mos ekzistonte kjo parti”, sepse të tilla kërcënime dhe shantazhe nga partia-shtet kompromentojnë rëndë funksionimin e drejtësisë së pavarur dhe të bazuar vetëm në ligj” – shkruan Tedi Blushi në facebook.
Discussion about this post