Sekretari i Përgjithshëm i Partisë së Lirisë Ted Blushi i është përgjigjur deklaratës së Veliaj i cili më herët u shpreh se Partia e Lirisë ka krahasuar Tiranën me Kabulin.
Blushi e quan gënjeshtër këtë deklaratë të bërë nga ana e kryebashkiakut, ndërsa shton se Partia e Lirisë e ka krahasuar Tiranën me Prishtinën.
Në një postim në rrjetin social facebook Sekretari i Përgjithshëm i Partisë së Lirisë ka renditur disa nga ndryshimet mes Prishtinës dhe Tiranës, ku kjo e fundit vjen duke u përkeqësuar në të gjithë sektorët.
“TË VËRTETAT E KRIMEVE TË ERION VELIAJ NDAJ TIRANËS! Erion Veliaj, mbi të cilin bie e gjithë përgjegjësia e madhe për krimet që i ka bërë kryeqytetit, gënjen, sikur Partia e Lirisë gjoja paska krahasuar Tiranën me Kabulin. Partia e Lirisë krahasimin e ka bërë me Prishtinën, as me Kabulin dhe as me Kopenhagenin. Qytetarët e Tiranës dhe qytetarët e Prishtinës dallohen sepse: Çmimet e konsumit në Tiranë janë 47.93% më të larta se sa në Prishtinë. Çmimet e ushqimeve në Tiranë janë 33.84% më të larta se sa në Prishtinë. Çmimet e qerasë së banimit për qytetarët në Tiranë janë 38.29 % më të larta se sa në Prishtinë. Çmimet e restoranteve në Tiranë janë 48.95% më të larta se sa në Prishtinë. Ku qëndron diferenca e madhe mes Tiranës dhe Prishtinës?”, shkruan ai.
Ndër të tjera Blushi shkruan se “Tirana ka kryebashkiakun e inceneratorëve, të betonizimit dhe kullave që nuk kanë kursyer as objektet e kultit, të shembjes së Teatrit Kombëtar, të korrupsionit (shet me lekë edhe varret e të vdekurve), të pastrimit të parave, të gjobave abuzive, të çmimeve dhe taksave të larta, të shkatërruesit pa ligj të shtëpive të qytetarëve. Ndërsa Prishtina ka një kryebashkiak të përgjegjshëm dhe patriot”.
Discussion about this post