Rezultatet paraprake të zgjedhjeve administrative në Britaninë e Madhe po konfirmojnë një avancim të fortë të partisë Reform UK të Nigel Farage, ndërsa Partia Laburiste po regjistron humbje të konsiderueshme në disa zona kyçe të vendit.
Forca politike e Farage po siguron qindra vende në këshillat lokalë, kryesisht në veri të Anglisë, territore që tradicionalisht kanë votuar për Labour. Në të njëjtën kohë, Reform po dëmton edhe konservatorët në zona të jugut, përfshirë Essex-in. Analistët britanikë po e cilësojnë këtë zhvillim si një goditje të fortë ndaj modelit tradicional dypartiak.
Ndërkohë, Partia e Gjelbër po fiton terren në qytete universitare si Oxford dhe Exeter, ndërsa liberal-demokratët po marrin mbështetje në zona më të pasura të jugut. Një nga rezultatet pozitive për konservatorët erdhi nga Londra, ku ata rikthyen kontrollin mbi këshillin simbolik të ëestminster-it.
Nigel Farage e cilësoi rezultatin si një “ndryshim historik në politikën britanike”, duke deklaruar se Reform UK po fiton në zona që kanë qenë bastione të laburistëve prej më shumë se një shekulli.
Edhe figura të së djathtës konservatore po e mbështesin hapur Farage. Ish-ministrja Suella Braverman deklaroi se ekziston “një probabilitet shumë i lartë” që ai të bëhet kryeministër në të ardhmen.
Brenda Labour po shtohen zërat kritikë ndaj drejtimit të Keir Starmer. Sipas raportimeve në mediat britanike, disa figura të rëndësishme të partisë kanë ngritur shqetësime për të ardhmen politike të kryeministrit pas këtyre rezultateve.
The Times raportoi se ministri i Energjisë, Ed Miliband, i kishte kërkuar Starmer-it të diskutonte një plan për tranzicionin e drejtimit të partisë. Presioni ndaj kryeministrit pritet të rritet në orët në vijim, ndërsa ende nuk ka një emër konkret për pasardhësin e tij.
Vetë Starmer e pranoi humbjen si “shumë të rëndë”, duke deklaruar se rezultati “dhemb”, por mori përgjegjësinë politike pa akuzuar figura të tjera brenda partisë.
Ai shtoi se disfata nuk do ta ndalë qeverinë nga realizimi i programit të premtuar për ndryshim.
Discussion about this post