Partizani ka triumfuar, me rezultatin 1-0, në duelin e vajtjes për turin e dytë kualifikues të UEFA Europa Conference League, përballë skuadrës nga Andorra, Atletik Eskaldes.
“Demat e Kuq” u mjaftuan me një gol të Mba, i ndihmuar edhe nga gabimi trashanik i portierit vendas, për të mbyllur në avantazh sfidën e parë, gjë që i jep kampionëve të Shqipërisë, një avantazh të rëndësishëm, në prag të sfidës së kthimit që do të zhvillohet pas një jave, në Shqipëri.
Pavarësisht suksesit, Partizani në këtë takim ishte i paqartë në lojën e tij, sidomos në fazën e finalizimit të aksioneve, duke mos arritur që të ishte i frikshëm për kundërshtarin që nga ana e tij, e kreu mjaft mirë, fazën mbrojtëse, duke arritur objektivin minimal e limitimit të dëmeve.
Taktika e trajnerit të Partizanit, Zoran Zekiç, për të insistuar me krosimet e larta, ishte deri diku, absurde, me kryeqytetasit që gabuan shumë nga pasimet e tyre, duke e dorëzuar topin “më shumë se duhet”, ndaj një ekipi tejet modest.
I vetmi që shpëton në këtë ndeshje, është sulmuesi Mba, i cili ishte autori i golit, megjithatë ai dhe jo vetëm duhet të bëjnë më shumë nëse duan që të kualifikohen për në fazën e grupeve, objektiv i deklaruar tashmë nga dirigjenca e klubit “të kuq”./m.b /gijotina.com
Discussion about this post