Partizani ka mbyllur mbrëmjen e sotme, aventurën e vet në UEFA Champions League, duke u eliminuar në turin e parë kualifikues.
Skuadra e tretë e kryeqytetit, u mposht me rezultatin 2-0 përballë bjellorusëve të BATE, në duelin e zhvilluar në periferi të Budapestit.
“Demat e Kuq” nuk patën fare idenë se si të godisnin portën, me mundësitë që i kishin të panumërta përballë portës bjelloruse.
Sulmuesi kryesor i Partizanit, në këtë takim, Mba, e kishte mendjen për të dërguar topin te tabelat publicitare ose jashtë stadiumit.
Ndeshja e skuadrës fituese të Abissnet Superiore, u karakterizua nga posedimi i topit, por edhe nga mungesa e qartësisë në metrat e fundit.
Bjellorusët, nga ana e tyre, nuk bënë shumë në pjesën e parë, duke shfrytëzuar vetëm kundërsulmet, të cilat, në 45 minutat e para i kishin shumë të pakta.
Në pjesën e dytë, Partizani, përsëri krijoi pjesën më të madhe të aksioneve për gol, por ashtu si në të parën, saktësia “kishte ikur me pushime”.
Atëherë kur pritej që takimi të shkonte në shtesë, BATE, në të vetmin aksion konkret, realizoi golin e kualifikimit, në minutën e 71’, me anë të Malkevich.
Në pjesën e mbetur të lojës, Partizani vazhdoi sulmet, por kthjelltësia ra akoma më ndjeshëm, me të kuqtë që shpërdoruan raste nga më të pabesueshmet.
Në fund, një zhgënjim i madh, me Partizanin që, dhe pas golit të dytë të pësuar në fund të shtesës prej 10 minutash, u eliminua në mënyrë katastrofike, ndaj një kundërshtari që, nuk krijoi më shumë se kundërshtari, por saktësia ka rëndësi në futboll.
Tashmë, Kampionët e Shqipërisë duhet të fokusohen në Conference League, ku në turin e dytë, do të përballen me Athletic Escaldes, nga Andorra, duke shpresuar që të përmirësojnë shënjestrën para portës, para se të jetë vonë./m.b /gijotina.com
Discussion about this post