Partizani mposht Teutën dhe afrohet me Europën, Vllaznia dhe Laçit vazhdojnë “agjërimin” e fitoreve

Në dy takimet e tjera të ditës së sotme vetëm Partizani arriti të merrte 3 pikët, pasi mposhti me shifrat 2-1 skuadrën e Teutës në “Elbasan Arena”, ndërsa në takimin tjetër të zhvilluar mes Vllaznisë dhe Laçit fitoi “frika”, pasi dy skuadrat u “dakortësuan” mes tyre për barazimin 0-0.

Në “Elbasan Arena” demat arritën të përmbysnin rezultatin ndaj durrsakëve të cilët kaluan të parët në avantazh me anë të Ivanovic në minutën e 27-të.

Por pas një goditje këndi nga të kuqtë, me topin që përfundon në këmbët e Skukës do të vinte edhe goli i barazimit, për të çuar skuadrat në barazim 1-1 në dhomat e zhveshjes pasi topi përfundoi në rrjetë në minutën e 46-të të pjesës së parë.

Pjesa e dytë do të ishte më e mirë për djemtë e Dritan Mehmetit të cilët tentuan për të gjetur golin e avantazhin, që do të vinte në minutën e 53-të nga Bitri, i cili pas një rrëmuje në zonën e Qirkos do të mposhte këtë të fundit për të çuar shifrat 2-1.

Skuka do të kërkonte të shënonte dopietë në këtë takim por tentativat e tij lënë për të dëshiruar, t4eksa nga krahu tjetër durrsakët do të përgjigjeshin me Blerim Kotobellin por pa mundur të ndëshkonin Hoxhën.

Në minutat shtesë të takimit demat e Mehmetit do të gjenin edhe golin e 3-të, pasi Miroslavljev shfrytëzon largimin nga porta të Pano Qirkos dhe i dhuron golin e tretë Partizanit.

Kjo sfidë do të mbyllej me fitoren e Partizanit, që tashmë arrin në kuotën e 41 pikëve në vendin e 4-të, ndërsa Teuta mbetet me 32 pikë në vendin e 6-të.

Sfida tjetër e zhvilluar në “Loro Boriçi” do të mbyllej 0-0 mes Vllaznisë dhe laçit, ku “frika” për të mos humbur mbizotëroi në këtë takim, i cili mbyllet pa shumë histori.

Në këtë mënyrë Shpëtim Duro nis “ekopën 2” në krye të kurbinasit me barazim, teksa bardhezintë vazhdojnë të mos fitojnë prej 7 javësh, rezultate këto që kanë vënë në rrezik edhe vendin e dytë në tabelën e klasifikimit me Kukësin që i “kërcënon” me vetëm 2 pikë nga pas.

Nga krahu tjetër edhe shkodranët e Elvis Plorit vazhdojnë “agjërimin”, pasi do të marrin kështu barazimin e dytë rresht, ndërsa prej 5 javësh kanë harruar shijen e fitores, teksa tashmë ka humbur edhe vendin e 4-të me Partizanin që i parakalon më 1 pikë në renditje.