Partizani para një sfide të vështirë, kundështari vjen me bilance pozitive

Partizani do të përballet në datën 11 korrik në “Air Albania” me BATE Borisov, në duelin e vlefshëm për raundin e parë të Champions Ligës.

Kampionët e Superiores do të tentojnë të marrin maksimumin nga kjo përballje, edhe pse në kampin e kuq janë të vetëdijshëm që do të përballen me një kundërshtar shumë të fortë.

Skuadra Bjelloruse, do të vijë në Tiranë, me moralin lartë, pas një ecurie pozitive në ndeshjet e fundit.

Mbrëmjen e djeshme BATE u përball me Shakhtjor Soligorskun, ku aktivizohen dy mesfushorët shqiptarë, Valon Ahmedi dhe Ardit Krymi, teksa rivali i Partizanit në Champions, arriti të triumfonte me rezultatin 2-0, falë golave të Laptev dhe Gromyko.

Në 3 ndeshjet e fundit, BATE Borisov, ka arritur të shënojë 16 gola dhe nuk ka pësuar asnjë.

Këtu përfshihet edhe triumfi 0-13 në duelin e Kupës ndaj Miorit.

Gjithsesi në kampionat, skuadra e BATE-s, renditet në vendin e katërt me 22 pikë në 14 ndeshje, 10 më pak se kryesuesit e Dinamo Minsk.