Klubi i Partizani pasi ka siguruar kualifikimin për në fazën play-off të Conference League, është ende në merkato për të paktën dy mbrojtës, pasi me shumë mundësi do të shitet Andi Hadroj. Së fundmi, mediat argjentinase kanë raportuar se 26-vjeçari Mauro Gabriel Osores është shënjestruar nga kampionët e Shqipërisë.
Ai pret të prishë kontratën me klubin Atletiko Tucuman për t’i hapur rrugën transferimit. “Eldiario24” ka shkruar se Partizani ka shfaqur interesim konkret për Osores dhe ky i fundit ka dhënë OK-in për kalimin në Shqipëri, por që më parë duhet të zgjidhë çështjen e kontratës.
Aktualisht Osores është në formë huazimi te klubi i ligës së dytë argjentinase, Atletiko Rafaela, teksa kampionati është në kulmin e tij (janë luajtur 25 javë nga 34 në total).
Osores është aktivizuar si titullar në 20 ndeshje me 1800 minuta në fushë, ndërsa ka arritur të shënojë edhe dy gola me Atletiko Rafaelën. Vlera e tij në treg sipas faqes “Transfermarkt” është 375 mijë euro.
Gjithashtu në orbitën e “demave” është edhe maqedonasi Todor Todoroski, që sezonin e kaluar ishte pjesë e Sumqayit në Azerbajxhan. Burime pranë lojtarit tregojnë se pritet të zyrtarizohet te Partizani së shpejti. Bëhet fjalë për një mbrojtës të djathtë të mirëfilltë./PanoramaSport
Discussion about this post