Që në verën e vitit 2021, kur në drejtimin e ekipit ishte Ilir Daja, Partizani nisi një cikël të ri, ku bazë e ekipit janë disa lojtarë të marrë në atë merkato. Pavarësisht se ai vit ishte i vështirë, më pas Partizani ka ardhur vetëm në ngjitje.
Sezonin e shkuar, dy vite pas “revolucionit”, Partizani u shpall kampion e më pas kërkoi rekordet në Europë, duke regjistruar katër fitore rresht, rekord historik, dhe shkuar deri në “play off”-in e Ligës së Konferencës. Më pas u fitua dhe Superkupa dhe tashmë e shohin vetën në një vit të ri, me një trajner të ri. Oreksi vjen gjithnjë duke u shtuar dhe në këtë edicion të ri të kuqtë do të kërkojnë të “thyejnë” disa tabu.
E para do të jetë që pas Skënderbeut, një tjetër ekip të fitojë dy herë radhazi titullin kampion. Në këto vite të fundit trofeu ka shëtitur në ekipe të ndryshme, më së shumti në kryeqytet. Përveç kësaj, objektivi tjetër madhor dhe një tjetër “tabu” korçare do të jetë kalimi në grupet e një kompeticioni europian. Të kuqtë këmbëngulën në verë për këtë sukses, por nuk ia dolën në dy duele tejet të ethshme ndaj kazakëve të Astanës.
Përveç kësaj, Shehi dhe “demat” e tij do të kërkojnë edhe Kupën e Shqipërisë, një trofe, të cilin nuk e njohin prej 20 vitesh, që nga viti 2004. Para janë tre “tabu”, që nëse “thyhen” do të kurorëzonin një tjetër vit të artë për kampionët në fuqi.
Discussion about this post