Partizani është vendosur në Elbasan nga dita e djeshme, ku po kryen përgatitjet e fundit para ndeshjes së nesërme ndaj Astanës në orën 20:00, pikërisht në “Elbasan Arena”. Në orën 18:30 skuadra ka zbarkuar në fushë. Trajneri Zekiç gjatë gjithë javës ka analizuar me kujdes kundërshtarin dhe ndeshjen e parë dhe është përpjekur t’u injektojë lojtarëve një mentalitet më të fortë dhe të ndërtojë një strategji më sulmuese, diçka e pritshme, pasi këtë ia dikton humbja minimale në ndeshjen e parë në Kazakistan.
Në stërvitje kanë qenë të gjithë lojtarët e listuar në UEFA. Lajmet e mira për trajnerin kroat janë gatishmëria e David Atanaskoskit dhe Eros Grezdës. Mbrojtësi maqedonas ka shlyer pezullimin me një ndeshje për shkak kartonësh dhe është i gatshëm. Ai ka të kaluar ndaj Astanës, pasi para se të zbarkonte në shtëpinë e kuqe, ka luajtur në Kazakistan. Në vitin 2022 Atanaskoski ishte pjesë e Shakter Karagandës dhe është përballur dy herë me Astanën, duke i humbur të dyja betejat dhe ndëshkuar një herë me karton të verdhë. Gjithsesi, ai e njeh shumë mirë skuadrën kazake dhe do të jetë një armë e shtuar për Zekiçin. Nga ana tjetër, Grezda, i cili u dëmtua në ndeshjen e parë, e ka kaluar shumë shpejt kontraktimin në kofshë dhe gjatë javës mësohet se ka arritur të tregojë një formë shumë të mirë dhe të bjerë në sy gjatë stërvitjeve të zhvilluara gjatë javës.
MBA – Rreshtimi i Zoran Zekiçit varet shumë nga prania e Kristian Mbasë, që ka mbajtur pezull në njëfarë mënyre një pjesë të planit të të kuqve. Burime pranë klubit për gazetën bëjnë me dije se shanset që Mba të luajë nga minuta e parë janë shumë të vogla. Nigeriani nuk është stërvitur prej dy javësh në kushte normale, teksa edhe dëmtimi në muskujt e barkut nuk është rikuperuar plotësisht. Kështu, shanset janë që nëse do të jetë nevoja, Mbasë t’i rezervohen minuta në pjesën e dytë.
FORMACIONI – Sa i përket formacionit, nuk pritet të pësojë shumë ndryshime nga ndeshja e fundit. Atanaskoski ul Zekollin në stol, ndërkohë që Maget shihet si titullar para Muratajt për faktin se senegalezi është më ofensiv dhe mund të ndihmojë më shumë manovrën sulmuese. Pjesa tjetër e skuadrës pritet e njëjtë.
Discussion about this post