Sot duke nisur që nga ora 19:00 do të “ngrijë” gjithë kryeqyteti. Në “Air Albania” do të luhet një nga ndeshjet më të zjarrta të futbollit shqiptarë.
Partizani-Tirana do të përplasin “brirët” në një sfidë që vjen më shumë se 3 pikë, pasi vjen përballë rivalit të përjetshëm.
Në këtë duel të dy skuadrat vijnë në pozicione të ndryshme në klasifikim. Demat vijnë si kryesuesit e kampionatit duke udhëhequr pas 5 javësh të luajtura, ndërsa bardheblutë nga ana tjetër renditen në vendin e 5-të me 8 pikë, 4 më pak se të kuqtë.
Kjo ndeshje pritet të dhurojë emocione dhe spektakël në fushën e lojës por edhe në tribuna, siç jemi mësuar shpesh të shikojmë vitet e fundit, me ekipet që do bëjnë maksimumin për të siguruar fitoren në derbin e parë për këtë sezon.
Kategoria e Parë ka rezervuar për ditën e sotme dy sfida mjaft interesante të javës së 4-të të saj.
Në fushën e lojës do të zbresë Dinamo e cila do të përballet në transfertë me Tomorin, me sfidën që do të nisë që në 12:30.
Blutë do të kërkojnë fitoren për të rimarrë vendin e parë, ndërsa beratasit do të tentojnë të mos dalin pa pikë në stadiumin e tyre.
Një tjetër sfidë interesante është edhe përballja mes Burrelit dhe Orikut, takim që do të luhet në orën 15:00.
Oriku do të kërkojë të mbajë vazhdimësinë e fitoreve, ndërsa burrelasit do shpresojnë të sigurojnë 3 pikët e para në këtë sezon.
Discussion about this post