Stresi dhe Noizy janë ngjitur për herë të parë së bashku në skenën e “Alpha Show”, koncertin që organizoi ky i fundit mbrëmjen e djeshme në Tiranë. Teksa interpretoi disa nga këngët më të suksesshme, Stresi mori një moment për të treguar një të vërtetë që nuk e ka ditur askush.
“13 vite më parë po tek ky shesh këtu jemi zënë për herë të parë dhe po tek ky shesh sot këtu jemi më të fortë se kurrë”, u shpreh reperi, deklarata e të cilit u prit me brohorima të mëdha nga fansat e tyre të flaktë. Në një moment ata përqafohen me njëri-tjetrin duke shkaktuar brohorima te adhuruesit e tyre.
Kujtojmë që dyshja e reperëve bënë paqe pak kohë më parë dhe shumë shpejt krijuan një raport të mirë me njëri-tjetrin. Ata kanë treguar mbështetjen që kanë për njëri-tjetrin dhe nëpërmjet mediave sociale dhe jo më larg se pak javë më parë, Noizy e konsideroi Stresin si familje.
Ndonëse, vitet e fundit dy reperët ishin treguar “të butë” ndaj njëri-tjetrit nëpër intervista, askush nuk e priste që ata të bëheshin sërish miq e të linin pas çdo problem që ka ndodhur në të shkuarën. Nëpërmjet dy videove live në llogaritë e tyre në Instagram Noizy dhe Stresi informuan fansat në 2021 se kanë bërë më në fund paqe dhe kanë falur njëri-tjetrin! Fillimisht ata thanë se thjeshtë nuk do merren më me njëri-tjetrit por shumë shpejt gjërat ndryshuan. Prej asaj kohe dy çunat kanë mbështetur projektet e njëri-tjetrit në rrjetet sociale, teksa nuk kanë munguar komentet edhe as takimet.
Discussion about this post