Në çdo ditë që ka rënë shi Tirana është zhytur e gjitha nën ujë, çdo rrugë bllokohet dhe uji vjen deri në gju. Kryetari i Bashkisë, Erion Veliaj, zyrtarisht shpenzon qindra milionë lekë për “zhbllokimin e pusetave”, por fondet zhduken në gropat e korrupsionit që hapen përmes tenderëve.
Denoncimet e bëra nga Gijotina.com për vjedhjen e këtyre fondeve u vërtetuan ditën e sotme nga vetë Bashkia Tiranë. Me firmën e Lali Erit është publikuar tenderi me objekt “Shpenzime për qiramarrje mjetesh transporti (Vinç kullë dhe Autobot për ujërat e zeza)”. Këto mjete do të përdoren deri në fund të vitit për të pastruar kanalizimet e zhbllokuara dhe për këtë Veliaj ka menduar të harxhojë 25 milionë lekë.
Në këtë situatë që ndodhemi, do ishte e nevojshme kjo ndërhyrje. Por, kjo s’mund të fshehë vjedhjen që po bëhet dhe faktin se kjo punë përsëritet paralelisht që Bashkia është duke paguar një kompani tjetër për zhbllokimin e pusetave.
Duket se po shfrytëzohet situata për t’i falur 25 milionë lekë një kompanie private. Sipas dokumentit të publikuar, ky tender është mbyllur pa zhvilluar një garë. Për riskun e lartë të korrupsionit që mbart procedura, Open Data Albania e ka klasifikuar me “Flamur të Kuq”.
Firma fituese “Pastrime Silvio” Sh.p.k, ku rezulton me letra pronare Bule Allmuça, në fakt drejtohet nga Fiqiri Allmuça. Kjo është një kompani e njohur për aferat me tenderat e pastrimit tek spitalet, ndërsa pronari i saj është ndjekur penalisht p[ara disa vjetësh.
Kujtojmë se Fiqiri Allmuça, ka qenë i proceduar penalisht për konsumimin e veprës penale te “shkeljes se rregullave te mbrojtjes në punë” në vitin 2008, ku 2 punëtorë të firmës u plagosën rëndë teksa po pastronin xhamat e jashtëm të një banke në kryeqytet. Kompania e tij ka marrë rreth 4 milionë euro tenderë të dyshimtë në mungesë konkurrence në 3 vite.
Foto, 8 nëntor 2023
Ndërkohë, Bashkia e Tiranës përmes Ujësjellës Kanalizimeve ka shpallur një tender për hapjen dhe zhbllokimin e pusetave në 23 gusht 2023. Fondi limit i prokuruar ishte 240 milionë lekë dhe tenderi u dha pa garë. Në prokurim u administrua vetëm një ofertë, ajo e bashkimit të operatorëve: “Onix” Shpk me pronar Sahit Dollapin dhe “Mane/S” shpk me pronar Bledar Manen.
Si garues të vetëm me një ofertë të përbashkët, pa konkurrencë, Sahit Dollapi dhe Bledar Mane u shpallën fitues. Po ku i çoi paratë Veliaj dhe Sahit Dollapi, pse duhet ky tender i ri?
Kështu bashkë, me tenderin e sotëm në kaq pak muaj ikën 290 milionë lekë në pusetat e korrupsionit. Jo më larg se dita e djeshme u vërtetua që pastrime, zhbllokime dhe punë të tjera nuk janë bërë në kryeqytet.
Ndonjë nga këto pusetat e bllokuara mund të shërbejë shumë mirë si provë materiale për një hetim të mundshëm të Lali Erit nga SPAK.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post