Pas arrestimit të Jeton Lamit, agjentit të forcave operacionale pasi shoqëroi Ervis Martinajn të shpallur në kërkim nga policia, Agjencia e Mbikqyrjes Policore po verifikon të gjithë oficerët e Operacionales dhe të Reneas. Agjencia po verifikon punësimet e dyfishta të efektivëve, po ashtu dhe kontaktet e tyre jashtë orarit të punës.
Policia ka informacione se disa nga efektivët e këtyre njësive elitë jashtë orarit të punës punojnë si badygard të personave me ngarkesa penale ç’ka i implikon ata në veprimtari të paligjshme.
Disa prej vrasjeve mafioze të ndodhura kohët e fundit në vend ende të pa zbardhura dyshohet se ekzekutorët kanë qenë profesionistë në përdorimin e armëve të zjarrit ç’ka hedh hije dyshimi edhe mbi njësitë elitë në Policinë e shtetit.
Arrestimi në korrik të këtij viti i ish-oficerit të RENEA-s Remal Rada, i cili pak muaj pas dorëheqjes u kap duke lëvizur me një snajper në makinë ngriti alarmin në Agjencinë e mbikqyrjes policore e cila përballë këtyre fakteve po përdor një filtër më të imtësishëm për njësitë elitë.
Discussion about this post