Pasi ministrja e Arsimit, Ervis Kushi hapi një dritë jeshile për maturantët, të cilët protestojnë për testin e Matematikës se do gjejë një zgjidhje për nxënësit, vjen një reagim nga këta të fundit.
Nga protesta e cila është transferuar para Qendrës së Shërbimeve Arsimore, maturantët theksuan se nuk kanë besim tek Ministria e Arsimit dhe deklarata e Kushit, nëse nuk shohin fakte.
“Na mashtruan, nuk kemi besim. Na thanë se nuk do të ketë pyetje nga programi që kemi bërë online. Janë mashtruesa. Pyetjet ishin më të vështira në këto vite.”, tha një prej protestuesve.
Një tjetër maturant gjithashtu shprehet se provimi ishte tepër i vështirë dhe shton se nëse nuk marrin zgjidhje do të bojkotojnë provimin e radhës.
Testi ishte goxha i vështirë. Janë gjëra që si kemi marrë dhe nuk i kemi parë ndonjëherë. Nuk organizohet protesta pa arsye. Nuk ka sens një provim i tillë,” tha ai.
Ministrja Kushi tha se po vlerësohet niveli i vështirësisë së çdo pyetje në test dhe në rast se rezulton mbi nivelin e parashikuar, do rishikohet shpërndarja e pikëve në test dhe mënyra e vlerësimit.
REAGIMI I MINISTRES
“Të dashur maturantë,
Siç ju kemi premtuar, ne do të jemi gjithmonë në mbështetjen tuaj. Në këto momente, jemi duke vlerësuar edhe një herë me grupet e ekspertëve nivelin e vështirësisë së çdo pyetjeje në testin e matematikës.
Dhe në rast se na rezulton që ai e tejkalon nivelin e parashikuar, të cilin e kushtëzon mënyra e zhvillimit të mësimit gjatë këtij viti shkollor, pa dyshim që ne do ta rishikojmë shpërndarjen e pikëve në test dhe mënyrën e vlerësimit.
Ju uroj shumë suksese për provimin e radhës!”
