Prokuroria e Posaçme ende nuk ka mbyllur hetimet në lidhje me aferën korruptive për ndërtimin e inceneratorëve që janë kallëzuar 6 muaj më parë nga Partia Demokratike dhe LSI. Mësohet se hetuesit nuk kanë administruar të gjithë dokumentacionin pranë institucioneve dhe janë ende në fazën e hetimeve paraprake.
Kur kanë kaluar më shumë se 6 muaj nga nisja e hetimeve për ndërtimin e inceneratorit të Tiranës, prokuroria e posaçme ende nuk ka mbyllur fazën paraprake të hetimeve.
Ishte fillimisht Partia Demokratike që nëntorin e kaluar depozitoi një kallëzim në SPAK, ku akuzonte për shpërdorim detyre dhe grup të strukturuar kriminal kryetarin e bashkisë së Tiranës Erion Veliajn, Ëngjëll Agaçin, Lefter Kokën, Alqi Bllakon dhe sipërmarrësit Klodian Zoto e Mirel Mërtiri.
Sipas Partisë Demokratike ndërtimi i inceneratorit të Tiranës i ka shkaktuar buxhetit të shtetit një dëm prej 430 mln euro. Burime nga prokuroria bëjnë me dije se, hetuesit janë ende në fazën e mbledhjes së informacionit, pasi disa institucione nuk kanë kthyer përgjigje për dokumentacionin e kërkuar.
Një tjetër kallëzim është depozituar në prokurorinë e posaçme këtë radhë nga partia LSI. Në mars të këtij viti, kryetarja e LSI Monika Kryemadhi denoncoi publikisht disa akuza për inceneratorin e Tiranës, duke e cilësuar si aferën më të madhe korruptive të 100 viteve të fundit.
Padia është depozituar në ngarkim të ish-ministrit të Mjedisit, Lefter Koka, kryetarit të Bashkisë Erion Veliaj, sekretarit të Përgjithshëm të Këshillit të Ministrave, Engjël Agaçi, ish-sekretarin e Përgjithshëm të Mjedisit, Alçi Bllako. Të gjithë këta zyrtarë sipas LSI kanë shkelur çdo në praktikën për ndërtimin e inceneratorit. /abcnews
