Kryetari i Bashkisë Librazhd, Mariglen Disha, nuk ka ndërmend të ndërpres abuzimet me tenderët edhe pse disa çështje po shkojnë në instancat kontrollore. Një rast i tillë është me prokurimin që ka objekt “Sistemim asfaltim i rrugës Funarës-Zdranjsh, Njësia Administrative Orenje, Bashkia Librazhd”.
Pra, do të shtrohet një rrugë që lidh dy fshatra në këtë zonë, ku në lojë është një vlerë prej 750 milionë lekësh. Pavarësisht denoncimeve për shkeljet, Disha nuk ka ndërmend të kursejë asnjë lek nga ky fond, por kërkon me patjetër t’i shpërdorojë të gjitha.
Afati i fundit për dorëzimin e ofertave ishte data 12 prill 2024, por duket se procesi do të stërzgjatet, sepse më datë 2 prill 2024, pranë Komisionit të Prokurimeve Publike ka mbërritur një ankesë nga firma “Rej” shpk, në pronësi të biznesmenit Luan Kapri.
Gijotina.com ka bërë publike dokumentet se çfarë përmban denoncimi i bërë ku ndër të tjera theksohej se bashkia ka vendosur një listë punonjësish që duhet të jenë në dispozicion, por në fakt një pjesë e mirë e tyre nuk përputhen me objektin e tenderit. Duke u shprehur se janë kërkesa të tepërta dhe i janë përshtatur vetëm ndonjë firmë të posaçme.
“Referuar natyrës së objektit të prokurimit i cili ka te bëjë vetëm me sistemim dhe asfaltim rruge, por referuar dhe zërave të punimeve të pacaktuara në preventivin bashkëlidhur dokumenteve të tenderit, rezulton se shumica dërrmuese e stafit mbështetës të kërkuar nuk gjendet në proporcion me objektin e kontratës, volumeve dhe vlerës së tij”, shkruan Kapri,
duke në lënë të kuptojmë që fondi limit i vendosur është tepër i lartë sepse do të behet vetëm rehabilitim i rrugës dhe jo ndërtim nga e para.
Më tutje ankimuesi thekson se “është kërkuar disponimin Përgjegjës për dëmet në mjedis, edhe kjo është një kërkesë e mbivendosur pasi në stafin inxhinierik është kërkuar prezenca e një inxhinieri Mjedisi, i cili vlerëson dhe ndjek realizimin e punimeve gjatë gjithë kohës me qëllim evidentimin dhe shmangieve të dëmeve të mundshme në mjedis”. Në thelb Kapri tregon se Disha ka përfshirë në dokumentet e tenderit staf që nuk është i nevojshëm ose janë të mbivendosur, çka automatikisht rrit edhe vlerën e fondit limit.
Pra, asaj kohe u vu theksi tek dy kritere që i japin përparësi një operatori të posaçëm dhe që nga ana tjetër rrisin fiktivisht shpenzimet.
KPP vendosi për anulimin e procedurës dhe i kërkoi kryetari Disha që të rishikonte dokumentet. Ky vendim nuk është zbatuar nga Disha, i cili ka hapur sërish garën për këtë tender.
Garën e ka shpallur më datë 17 korrik 2024 dhe sipas të dhënave do të qëndrojë e hapur deri më datë 1 gusht 2024. Shihet se Disha ka hequr kriterin për ekspert zjarrfikës apo ekspert hidroteknik, por nuk janë reduktuar nga fondi limit shpenzime që ishin llogaritur për to.
Duke qartë se Disha e pa bërë pazarin se ku do të shkojnë ato lekë dhe nuk ka ndërmend ta ulë fondin limit. Prandaj, vazhdon me tenderin i cili është anuluar dy herë. Open Data Albania i ka vendosur prokurimit “Flamurin e Kuq” që është shenja treguese e riskut të korrupsionit. Tashmë iu mbetet instancave përkatëse që të marrin masa. Ndryshe, pas ca muajsh do të shohim një rrugë e bërë shkel e shko dhe paratë do të kenë firuar pa arritur tek zbatimi i projektit.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post