Pas disa orësh protestë dhe bllokim rrugësh ka pasur tensioni në Tiranë në fund të rrugës Myslym Shyri. FNSH dhe Shqiponjat kanë ndërhyrë për të shpërndarë protestuesit ndërsa disa qytetarë janë shoqëruar nga efektivët. Protestuesit më herët kanë bllokuar rrugën pranë ish-bllokut ndërsa ishin sërish efektivët ata që ndërhynë duke i zhvendosur. Protestuesit të cilët kanë bllokuar edhe qarkullimin e automjeteve shprehen se nuk do të largohen, por do të vijojnë të protestojnë.
Për këtë ka reaguar edhe Policia e Shtetit ku sqaron se pas protestës që u zhvillua në kryeqytet, ku protestuesit, kanë bllokuar rrugët kryesore, në shenjë revolte ndaj çmimit të naftës. Policia sqaron, se gjatë protestës grupe të rinjsh kanë bllokuar lëvizjen e automjeteve, ndërsa shtojnë se bllokimi i rrugëve përbën vepër penale. Nga kjo situatë, ata thonë se janë detyruar të reagojnë dhe të shpërndajnë qytetarët.
“Në vijim të protestës së zhvilluar në bulevardin “Dëshmorët e Kombit”. Gjatë përfundimit të protestës disa grupe të rinjsh kanë bllokuar lëvizjen e lirë të automjeteve dhe qytetarëve, si dhe po kundërshtojnë thirrjet e punonjësve të Policisë për të mos bllokuar rrugët pasi bllokimi i tyre përbën vepër penale. Nisur nga situata e krijuar, Policia e Shtetit bën thirrje për personat që kanë bllokuar rrugët dhe kundërshtojnë punonjësit e Policisë, të ndalin menjëherë këto veprime dhe të shpërndahen, pasi do përballen me forcën e ligjit. Policia e Shtetit është e vendosur të jetë në mbrojtje të të drejtave dhe lirive themelore të qytetarëve, edhe të atyre që protestojnë në mënyrë paqësore, si një e drejtë kushtetuese, por nga ana tjetër, Policia e Shtetit nuk do të tolerojë veprime që bien ndesh me ligjin dhe cenojnë rendin e sigurinë, lëvizjen e lirë të qytetarëve dhe të automjeteve” – thuhet në njoftimin e Policisë.
Discussion about this post