Afrim Qëndro i cili prej disa kohesh ka mbajtur detyrën si nënkryetar i Bashkisë së Vlorës, ka dhënë sot dorëheqjen e parevokueshme nga ky post. Një ditë pasi Gijotina.com raportoi se gjatë mbledhjes me Arben Ahmetajn, Qëndro paralajmëroi se do të largohej nga Vlora, vetë socialisti e konfirmoi këtë gjë ditën e sotme në një prononcim për mediat.
Ai u shpreh se kishte përmbushur detyrat në Vlore dhe tani do kthehet pranë familjes në Tiranë.
“Unë sot nuk dorëzova vetëm detyrën, kam ardhur politikisht me vendim të kryesisë së PS në 2016-ën. E kam kryer këtë detyrë për vite me radhë. Në një moment të caktuar kryeministri më ka kërkuar në korrik të vitit të kaluar në asamblenë e PS në Vlorë. Më ka kërkuar që të kryej dhe detyrën e nën kryetarit të Bashkisë në Vlorë, ka pasur dy objektiva, ndjekjen e zhvillimin e të gjitha projekteve të Qeverisë shqiptare dhe punët që çalonin në Bashkinë e Vlorës. Drejtuesi politik me të cilin isha unë bashkudhëtar ka ikur me një detyrë tjetër në PS, unë mendoj se dhe detyrat e mia kanë mbaruar këtu dhe do shkoj në Tiranë, pranë familjes time. Me Damianin na bashkoi ky udhëtim politik, unë do iki me detyrë në partinë në Tiranë”.
Duke thumbuar kryebashkiakun Dritan Leli, ai tha se në Vlorë ka mbushur dhe disa gropa, dhe se nuk bëhet fjalë për gropat e asfaltit në rrugët e qytetit.
“Në funksionim e punëve në Vlorë ka pasur disa gropa dhe nuk bëhet fjalë për gropat e asfaltit në rrugët e qytetit që përgjithësisht janë mbyllur, por ka pasur disa gropa të tjera si ndriçimi i qytetit që ka qenë në errësirë dhe sot është i ndriçuar. Ka pasur një gropë se mbytej Novosela dhe sot është bërë një projekt që s’do mbytet më. Ka pasur probleme dhe në disa lagje si Llonxhë, Karabash ku s’ka pasur ujë të pijshëm dhe sot janë mbyllur. Për të mos folur dhe për disa gropa të tjera që unë kam mbyllur nëpërmjet punës. Jam munduar që të flas pak, përmes punës. Përveç punëve që kam bërë në Vlorë, lagjia e Coles ose zona e Kumes, ujësjellësi që pritet të nisë shumë shpejt në Novoselë. Unë kam dorëzuar sot para detyrës dhe tre projekte të tjera,”- tha ai.
Qëndro e ka mbyllur deklaratën e tij duke falenderuar socialistet e qarkut Vlorë për rezultat, ndërsa pyetjes nëse Leli e priti dorëheqjen në zyrë, Qëndro e injoroi duke thënë se ka dhënë dorëheqjen e parevokueshme.
