Një tjetër tender i bërë nga Agjencia e Blerjeve të Përqendruara ka përfunduar në zyrat e Komisionit të Prokurimeve Publike. Në datën 7 korrik 2021, kjo agjenci ka hapur procedurën me numër reference REF-00454-07-07-2021, me qëllim blerjen e tonerave, ose siç njihet ndryshe bojë printeri, për Kryeministrinë dhe institucioneve në varësi të saj. Ky tender kap fondin limit prej 26,355,605 lekëve të reja, ose rreth 264 milionë lekë të vjetra.
Në këtë tender kanë marrë pjesë në garë dy kompani, “Marketing & Distribution”, e cila ka ofruar 8,291,138 lekë të reja, ose rreth 83 milionë lekë të vjetra. Dhe kompania “Infosoft Office” e cila ka ofruar 11,126,012 lekë të reja, ose rreth 111 milionë lekë të vjetra dhe të dyja kompanitë janë skualifikuar nga gara.
Por kompania “Infosoft Office” nuk ka qenë dakord me skualifikimin, pasi sipas saj arsyeja që është skualifikuar për mos paraqitjen e një katalogu për secilin lloj të tonerit, nuk qëndron. Për këtë, i është drejtuar KPP me një ankesë dhe në të sqaron se para se të skualifikohej, Autoritetit Kontraktues, pra të Agjencisë së Blerjeve të Përqendruara, i ka kërkuar kompanisë një korrigjim të gabimit aritmetik, ku kompania i është përgjigjur në bazë të ligjit. Sqarimin e kompanisë, Agjencia e Blerjeve të Përqendruara e kishte vlerësuar si të rregullt. Në këtë kuptim edhe katalogu i paraqitur nga ana e kompanisë ishte vlerësuar si i rregullt, dhe oferta e kompanisë kishte kaluar fazën e kualifikimit.
Pra, edhe katalogu i paraqitur nga ana e kompanisë ishte vlerësuar i rregullt dhe përmbushte kërkesën e Agjencisë së Blerjeve të Përqendruara. Por papritur në momentin e marrjes së klasifikimit, Agjencia çuditërisht ka ndryshuar mendim, me pretendime për katalogun e paraqitur nga ana e “Infosoft Office” i cili më parë ishte vlerësuar si i rregullt pa sqaruar asgjë se cilën kërkesë konkretisht nuk plotëson ky katalog. Sipas kompanisë, katalogu i paraqitur përmban informacion të detajuar lidhur me tonerat që ka ofertuar. Pasi e ka gjykuar ankesën, KPP ka vendosur që autoriteti kontraktor të anulojë vendimin e Komisionit të Vlerësimit të Ofertave (KVO) mbi skualifikimin e operatorit ekonomik “Infosoft Office” SHPK, si dhe të korrigjojë shkeljet, duke e kualifikuar këtë kompani.
Por, ndryshe nga sa ka kërkuar KPP, Agjencia e Bledi Çuçit sërish nuk e ka kualifikuar kompaninë në fjalë, kësaj radhe me arsyetimin se oferta e paraqitur prej saj nuk arriti që të bind Agjencinë e Çuçit se ajo është e rregullt në të gjitha elementet e saj. Pra, siç duket, oferta e kompanisë “Infosoft Office” që ka menduar ta kryej punën me rreth 153 milionë lekë më pak nga ç’ka vendosur agjencia, Çuçit nuk u pëlqen.
Por kompania “Infosoft Office” SHPK, duke qenë se është e bindur në dokumentet dhe propozimate e saj që i ka të rregullta dhe brenda ligjit, përsëri i është drejtuar KPP-së me një ankesë të dytë për këtë tender. Në arsyetimin e saj, kompania shprehet se oferta e paraqitur prej tyre është diskutuar me furnitorët e tyre enkas për këtë tender, ku për të bindur KPP-në e ka sqaruar edhe me tabelat e çmimeve në detaj. Sipas kompanisë, fatura e blerjes së produkteve, fletë zhdoganimi të produkteve si dhe analizën e detajuar të kostos për çdo artikull, janë të paraqitura.
“Po të analizohen çmimet e paraqitura në to, shihet lehtësisht që produktet janë blerë apo do të blihen me çmime më të ulëta se ato të paraqitura në tender, duke vërtetuar plotësisht që kompania jonë ka të gjitha mundësitë reale për ti siguruar produktet e prokuruara me çmime më të ulëta sesa ato të ofertuara. Pra kemi vërtetuar me dokumentacion të shumtë që çmimet e blerjes së produkteve janë ato të deklaruara në analizën e kostos” – shprehet kompania në arsyetimin e ankesës së saj.
Dhe siç duket “inati” i drejt i kompanisë ka shkuar deri në fund, e cila ka bindur edhe KPP-në që të anulojë vendimin e KVO-së mbi skualifikimin e operatorit ekonomik “Infosoft Office” SHPK, si dhe të korrigjojë shkeljet, pra që të kualifikojë këtë operator ekonomik. Edhe kësaj radhe i janë prishur planet Çuçit që të shpenzojë miliona lekë të taksave të qytetarëve nëpërmjet kësaj Agjencie. Këtë na e tregon edhe insistimi i kompanisë në fjalë, e cila i ka shkuar deri në fund idesë që, punën që Çuçi do që ta bëjë me 264 milionë lekë të vjetra, kompania në fjalë e bën për rreth 111 milionë lekë të vjetra, ose e thënë më qartë, rreth 153 milionë lekë të vjetra më pak, që do t’ia kursejë taksave të qytetarëve.
Gijotinja.com
Discussion about this post