Pas zhvendosjes së mijëra njerëzve nga Filipinet për shkak të tajfunit Ragasa, stuhia më e fortë e vitit po i afrohet Hong Kongut.
Aeroporti Ndërkombëtar i Hong Kongut do të anulojë sot shumicën e udhëtimeve, ndërsa shumë prej shkollave e bizneseve do të qëndrojnë të mbyllura.
“Qeveria këshillon anëtarët e publikut me udhëtime të gjata ose të vështira për në shtëpi ose që duhet të kthehen në ishujt periferikë që të fillojnë udhëtimet e tyre tani. Qeveria tani po bën rregullime për të liruar punonjësit e saj në përputhje me rrethanat“, shkroi autoriteti meteorologjik i Hong Kongut.
Po ashtu, miliona njerëz mund të preken nga stuhia, e cila pritet të arrijë në provincën Guangdong të Kinës të mërkurën (24 shtator).
Kina ka urdhëruar të paktën 10 qytete të mbyllin shkollat dhe bizneset gjatë ditës së sotme. Autoritetet në qytetin kinez Shenzhen, i cili është fqinj me Hong Kongun, kanë evakuuar gjithashtu 400,000 njerëz dhe u kanë bërë thirrje banorëve të qëndrojnë në shtëpi.
Kujtojmë se në shtator të vitit 2023, supertajfuni Saola, i cili shënoi shpejtësi maksimale të qëndrueshme të erës prej 210 km/orë, kaloi pranë qytetit, duke bërë që autoritetet të lëshonin sinjalin nr. 10 të uraganit (paralajmërimi më i lartë për stuhi) për më shumë se shtatë orë.
Supertajfuni Mangkhut në vitin 2018 (deri më sot tajfuni më intensiv që ka goditur qytetin) shkaktoi plagosjen e rreth 200 personave, fundosi anije dhe shkatërroi infrastrukturën, ndërsa humbjet ekonomike u vlerësuan në 4.6 miliardë dollarësh hongkan (592 milionë dollarë).
Në vitin 2017, tajfuni Hato shkaktoi përmbytje të mëdha dhe plagosi më shumë se 100 persona në qytet. Që nga viti 1962, të paktën katër tajfunë të tjerë kanë shkaktuar sinjalin nr. 10 në Hong Kong.
Autoritetet e qytetit e krahasuan kërcënimin serioz që Ragasa përbën, me atë të Mangkhut dhe Hato.
Discussion about this post