Afro 24.600 aplikime janë depozituar në Qendrën Kombëtare të Biznesit gjatë vitit të kaluar në regjistrin e pronarëve përfitues, i cili është detyrim ligjor.
Ligji për pronarët përfitues është miratuar që në vitin 2020, dhe afati për depozitimin e të dhënave ishte pikërisht vera e atij viti. Vlerësohet se janë në total rreth 60 mijë kompani të cilat kanë detyrimin për zbardhjen e pronarëve përfitues apo zotëruesve fundorë të aksioneve.
Por fillimisht me kërkesë të disa shoqatash biznesi, Qeveria vendosi të shtyjë disa herë këtë afat, për të shkuar te shtyrja e fundit që i përket qershorit 2022, edhe pse shumë kompani kanë vijuar ta neglizhojnë këtë detyrim ligjor.
Për këtë arsye QKB njoftoi marrjen e masave penalizuese kundrejt subjekteve duke mos ofruar shërbim ndaj kësaj kategori, përveç regjistrimit të ndryshimeve të të dhënave të përfaqësuesit ligjor, si dhe ka bërë ndryshime në statusin për subjektet raportuese nga status “aktiv” në statusin “të pezulluar” në Regjistrin Tregtar dhe në Regjistrin e Organizatave Jofitimprurëse deri në pagimin e gjobës dhe regjistrimin e të dhënave përkatëse për pronarët përfitues.
Penalitetet financiare ndaj bizneseve që nuk respektojnë detyrimin ligjor për depozitimin e të dhënave, nisin nga 500 dollarë për rastet e mosrespektimit të afateve, për të shkuar deri në 6 mijë dollarë kur autoritetet konstatojnë se ato bëhen me qëllim për të fshehur të dhëna të rëndësishme mbi burimet financiare të pronarëve apo aksionerëve të tyre.
Ligji për pronarët përfitues ka ardhur si një rekomandim i Moneyval, strukturës europiane kundër pastrimit të parave, dhe ka qëllim zbardhjen e pronarëve të vërtetë, apo aksionerëve që qëndrojnë pas kompanive.
Në nëntor të vitit që lamë pas, qeveria ka vendosur në dispozicion një shumë prej 46 milionë lekësh për rimbursimin e gjobave që u janë vendosur dhe janë paguar nga bizneset që nuk kanë zbatuar detyrimin ligjor për regjistrimin e pronarëve të tyre përfitues sipas afateve të përcaktuara, ndërsa u është vendosur si kusht përfundimi i këtij procesi. SCAN
Discussion about this post