Guvernatori i Bankës së Shqipërisë, Gent Sejko, këmbëngul se nuk ka pasur kompetencë të parandalonte skandalin e mikrokredive, duke ia lënë përgjegjësinë institucioneve të tjera.
“Duke marrë shkas nga diskutimet e fundit mbi situatën e krijuar në një segment të veçantë të sistemit financiar, atë të trajtimit të kredive me probleme, Këshilli Mbikëqyrës gjen me vend të theksojë sa më poshtë. Banka e Shqipërisë është një institucion kushtetues, i mandatuar nga ligji me një mision thelbësor për zhvillimin e qëndrueshëm të vendit: atë të ruajtjes së stabilitetit të çmimeve dhe të mbështetjes së stabilitetit financiar. I gjithë aktiviteti politikëbërës, rregullator dhe mbikëqyrës i institucionit, ka qenë dhe mbetet i orientuar ekskluzivisht drejt përmbushjes së këtij misioni”, deklaroi sot Gent Sejko, në vijin të reagimit të mëparshëm ndaj letrës s Presidentit Begaj në Kuvend për këtë problem. Megjithatë, deklaron se duhet reformuar sektori.
Me këtë rast, Sejko garantoi se “Banka e Shqipërisë dhe Këshilli Mbikëqyrës mbeten të gatshëm të mbështesin në vijim të gjitha reformat e nevojshme ligjore për adresimin e problematikave që kanë dalë në pah nga zhvillimet e tregut të trajtimit të kredive me probleme, si dhe të ndërmarrë me prioritet çdo nismë të nevojshme rregullatore, e cila qëndron brenda mandatit dhe kompetencës së vet”.
“Këshilli Mbikëqyrës i Bankës së Shqipërisë ka ushtruar me përgjegjësi e profesionalizëm detyrën e tij, si organi më i lartë vendimmarrës dhe mbikëqyrës i Bankës së Shqipërisë. Ai ka marrë gjithnjë vendime në interes të së mirës publike të vendit dhe të shoqërisë, ka monitoruar me vëmendje dhe në përputhje me mandatin ligjor zbatimin e detyrave të ngarkuara, si dhe është njohur rregullisht me raportimet e njësive organizative të Bankës, përfshi edhe ato të mbikëqyrjes bankare. Në tërësi, Këshilli Mbikëqyrës vlerëson se aktiviteti i Bankës së Shqipërisë ka qenë në përputhje me bazën ligjore e rregullatore dhe i ka shërbyer përmbushjes së misionit të saj në linjë me nevojat e zhvillimit ekonomik të vendit”, u justifikua Guvernatori i BSH.
Kujtojmë se Sejko është subjekt i një hetimi për skandalin e mikrokredive i nisur nga Prokuroria e Tiranës,i marrë së fundmi në dorë nga SPAK.
Ndërkohë Këshilli Mbikëqyrës i Bankës së Shqipërisë ka miratuar raportin e politikës monetare për tremujorin e tretë. Këshilli i BSH ka lënë të pandryshuar norma bazë e interesit në nivelin prej 3 përqind. Guvernatori Gent Sejko, me anë të një deklarate për mediat përmendi disa faktorë që kanë çuar në marrjen e këtij vendimi.
Guvernatori tha se, sipas të dhënave të INSTAT, ekonomia shqiptare u rrit me 3.6% gjatë tremujorit të parë të vitit.
“Bazuar në sa më sipër, Këshilli Mbikëqyrës i Bankës së Shqipërisë vendosi:
- të mbajë të pandryshuar normën bazë të interesit, në nivelin 3.0%;
- të mbajë të pandryshuar normën e interesit të depozitës njëditore, në nivelin 2.0%;
- të mbajë të pandryshuar normën e interesit të kredisë njëditore, në nivelin 4.0%.
Këshilli Mbikëqyrës gjykon se qëndrimi aktual i politikës monetare mbetet i përshtatshëm për përmbushjen e objektivit tonë të stabilitetit të çmimeve në të ardhmen”, tha Sejko në konferencën për shtyp.
gijotina.com/
Discussion about this post