Presidentja e Komisonit Europian, Ursula Von der Leyen, në përpjekje për të treguar mbështetjen e saj për integrimin e Ballkanit Perëndimor në Bashkimin Evropian, ka theksuar se do të mbajë një vizitë zyrtare brenda këtij muaji në rajon.
“Para fundit të muajit, do udhëtoj në Ballkan për të përçuar angazhimin tonë për anëtarësimin në BE. Ne ia kemi detyrim këtë të rinjve, që besojnë në të ardhmen evropiane. Ne po rrisim investimet në Ballkanin Perëndimor me rreth një të treten e prodhimit të brendshëm bruto të rajonit. Investimi në të ardhmen e Ballkanit është një investim për BE-në,” ka thënë Von der Leyen.
Në fjalimin e saj vjetor mbi raportin e BE para Parlamentit Europian, Von der Leyen tha se pandemia tregoi se evropianët mund të bëhen së bashku për të tejkaluar vështirësitë.
“Nëse reflektoj mbi vitin e kaluar dhe gjendjen e Bashkimit Evropianit unë shoh një shpirt të fortë në gjithçka që bëjmë. Në krizën kryesore globale të shëndetit ne jemi bashkuar për të siguruar që të gjitha skajet e Evropës të kenë vaksina dhe ne kemi vazhduar me brezin e ardhshëm të BE -së dhe me marrëveshjen e Gjelbër. Ne kemi vepruar si një Evropë e bashkuar dhe mund të jemi krenar për këtë “, tha Von der Leyen.
Presidentja nënvizoi se prioritet i unionit është shpërndarja e vaksinave duke bërë me dije se deri në mesin e vitit të ardhshëm, në vendet me të ardhura të ulëta do të shpërndahen 200 milionë doza.
“Të mos shndërrohet në një pandemi e të pavaksinuarve. Duhet të marrim masa për të përballuar një tjetër situatë të rëndë shëndetësore, sepse kemi mjetet e duhura shkencore”, u shpreh presidentja para euro deputetëve.
Von der Leyen ka paralajmëruar gjithashtu një deklaratë të përbashkët BE-NATO deri në fund të vitit. Ajo nënvizoi se Evropa ka nevojë për një shpirt, një ideal dhe dëshirën e politikës për t’i shërbyer këtij ideali.
