Presidentja e Komisionit Europian, Ursula Von der Leyen pritet që të vizitojë Shqipërinë më 28 shtator. Lajmin e ka konfirmuar ambasadori i BE në Shqipëri, Ligi Soreca, i cili është shprehur se po e pret me padurim vizitën e saj.
Por këtë e ka shprehur edhe vet Ursula Von der Leyen ditën e sotme gjatë fjalimit vjetor në seancë plenare të Parlamentin Europian. Ajo ka shpalosur vizionin e ekzekutivit europian mbi gjendjen aktuale të Bashkimit Europian. Në këtë fjalim, Von der Leyen është ndalur dhe te perspektiva europiane e Ballkanit Perëndimor dhe ka komunikuar se do të vizitojë këtë muaj vendet e rajonit.
Vizita vjen para samitit BE-Ballkan Perëndimor, që do të mbahet në tetor në Slloveni, ku zgjerimi i Bashkimit Europian trajtohet si një prioritetet i Bashkimit Europian dhe pjesë e vizionit të përbashkët të institucioneve kyçe dhe shteteve anëtare të kësaj organizate.
“Para fundit të muajit, do udhëtoj në Ballkan për të përçuar angazhimin tonë për anëtarësimin e këtyre vendeve në BE. Ne ia kemi detyrim të rinjve, që besojnë në të ardhmen europiane. Ndaj, ne po rrisim mbështetjen tonë për planin ekonomik dhe të investimeve në Ballkanin Perëndimor me një të tretën e prodhimit kombëtar bruto të rajonit. Investimi në Ballkanin Perëndimor është investim për Bashkimin Europian” – deklaroi ajo.
Von der Leyen është ndalur gjithashtu te konteksti i pandemisë, duke nënvizuar se Bashkimi Europian ka shpërndarë 700 milionë doza vaksinash brenda Bashkimit Europian dhe 700 milionë doza për 130 vende jo anëtare, ndërkohë që 1,8 miliard doza vaksinash janë tashmë të siguruara. Von der Leyen ka nënvizuar, se janë shpërndarë 400 milionë certifikata dixhitale COVID-19. Lidhur me rimëkëmbjen ekonomike, presidentja Von der Leyen është shprehur se Bashkimi Europian do të investojë në 5G dhe në fibër.
