Pas ngjarjeve kriminale, Çuçi në zyrën e Rrumbullakut/ Çfarë pritet

Ministri i Brendshëm Bledi Çuçi dhe kryepolici Muhmet Rrumbullaku po zhvillojnë një takim lidhur me ngjarjet e fundit kriminale në vend.

Nga raportimet mësohet se takimi po zhvillohet në zyrën e Rrumbullakut në Drejtorinë e Përgjithshme të Policisë së Shtetit.

Në javën e fundit, vetëm në zonën e Krujës, kanë ndodhur dy ngjarje të rënda kriminale. E para ishte ekzekutimi i Ramazan Sino, kunatit të Gentian Bejtjës dhe plagosja e dy fëmijëve të mitur të këtij të fundit, në një atentat të mirëorganizuar.

Pak ditë nga kjo ngjarje, dy qytetarë u dhunuan brutalisht nga pjesëtarë të fisit Rraja, ndërsa sipas raportimeve në aktet e dhunës u përfshinë edhe dy vëllezërit dhe djali i deputetit socialist Rraman Rraja.

Si në ngjarjen e parë ashtu edhe në të dytën, Policia ka reaguar me shumë vonesë. Madje në rastin e dhunës, duket se kishte një tentativë të policisë për të mbajtur larg përgjegjësisë familjarët e deputetit, ndërsa kishte një presion nga mediat dhe opinioni publik që identifikuan në kohë reale protagonistët e dhunës.

Ndërkohë një tjetër ngjarje e rëndë kriminale ende e pazbardhur është ekzekutimi në pritë, në zonën e Dukagjinit të babë e bir.