Në një intervistë për mediat, deputeti Belind Këlliçi tha se vijon puna për heqjen e dyerve të blinduara. Këlliçi u shpreh se asnjë prej mbështetësve të Lulzim Bashës nuk është paraqitur në seli, që nga dita e premte Komisioni i Rithemelimit ka marrë kontrollin e selisë së Partisë Demokratike, pasi Gjykata e Tiranës certifikoi Kuvendin e 11 Dhjetorit.
“Kam qenë në tre ditët e fundit në seli. Një lajm i mirë që ka qytetarë që janë rikthyer. Askush nga mbështetësit e zotit Basha nuk kanë qenë prezentë. As zoti Alibeaj, kryetar grupi se nuk ka kryetar të komanduar është shkarkuar. Në godinë nuk ndodhet askush. Në ndryshim nga ata mentaliteti ynë është përbashkues. Mund të vinë kur të duan. Janë zhdukur nga dita e premte kur ne vajtëm në seli” – u shpreh Këlliçi.
Deputeti konfirmoi po ashtu edhe ndryshimet në zyrën e shtypit. Ai tha se në këtë zyrë ndodhet vetëm Silvi Bardhi.
“Në zyrën e shtypit nuk ndodhet asnjë tjetër përveç zonjës Silvi Bardhi. Kemi rikthyer në punë rojën” – theksoi ai.
Kujtojmë se ditën e sotme Komisioni i Rithemelimit ka hequr të gjithë zyrën e shtypit e PD-së, përveç zonjës Bardhi e cila ka punuar edhe më herët me ish-kryeministrin Berisha.
Discussion about this post