Duke filluar nga e hëna, mësimi në shkollat e vendit do të bëhet pa turne ndërsa orët mësimore do të kenë kohëzgjatje normale. Lajmin e bëri të ditur ministrja e Arsimit Evis Kushi, në një video-mesazh informues.
Ndërsa ka kujtuar edhe zbatimin e masave anti-covid në ambientet e shkollës.
“Përgjegjësia jonë e përbashkët është edhe më e madhe për të zbatuar masat e nevojshme që mbrojnë shëndetin e të gjithëve: vazhdimi i procesit të vaksinimit, mbajtja e maskave, dezinfektimi i mjediseve, ruajtja e higjienës, në mënyrë që mos të jemi të detyruar t’i rikthehemi më skenarit të mësimit me turne”, tha Kushi.
Ky vendim vjen menjëherë pas peticionit të firmosur nga prindërit të cilët ishin kundër zhvillimit të mësimit me turne.
