Pas kryeministri Edi Rama që u shpreh sërish ditën e sotme, së “dora është e shtrirë për bashkëpunimin me opozitës”, dhe kryetari i Grupit Parlamentar të PS, Damian Gjiknuri “i shtrin dorën” Bashës.
Në një postim në Facebook, Gjiknuri shkruan se “Partia Socialiste do ta ketë të shtrirë dorën e bashkëpunimit me opozitën në funksion të së ardhmes europiane të Shqipërisë”.
Ndër të tjera, ai falënderoi qytetarët që votuan PS më 25 prilli dhe siguruan mandatin e tretë të Ramës në qeveri.
“Falenderim i përzemërt për 768,134 anëtarët, simpatizantët e mbështetësit që me votën e tyre i dhanë Partisë Socialiste dhe Edi Ramës shumicën e nevojshme dhe besimin për të udhëhequr Shqipërinë në 4 vitet e ardhshme.
Duke i uruar sukses Kuvendit të ri, shpreh besimin e plotë se me punën e tij, Grupi Parlamentar i Partisë Socialiste do të luajë rolin e çmueshëm për të çuar përpara proceset e rëndësishme legjislative, duke mbrojtur interesat e të gjithë qytetarëve shqiptarë”, shkruan Gjiknuri në Facebook.
Ditën e sotme u mbajt seanca e parë plenare në orës 10:00 për verifikimin e mandatit të deputetëve, ndërsa në orë 17:00 është parashikuar seanca e radhës për emërimin e ish-ministres Lindita Nikolla si kryetare e Kuvendit.
Surprizat këtë i rezervoi PD, ku mbrëmjen e djeshme, Lulzim Basha njoftoi përjashtimin nga grupi parlamentar të ish-kryeministrit dhe liderit historik të PD, Sali Berisha. Vendimi sipas Bashës është personal dhe nuk e hodhi në votim, pasi nuk donte përçarje në parti.
Berisha pas këtij veprimi ka deklaruar se nuk do të krijoj një grup të ri, por do të vazhdoj betejën për të rikthyer sovranitetin e PD. Madje, në daljen e tij për media, ai ka artikuluar dhe dorëheqjen e liderit të sotëm të opozitës, duke u shprehur se duhet të kishte dhënë dorëheqjen pesë herë para se të vriste sovranitetin e PD.
