Pas sherrit hapi zjarr me të riun, arrestohet te Trauma administratori i Kallmetit

Besnik Simoni, administratori i Kallmetit që u plagos dje me 3 plumba është arrestuar sot në spitalin e Traumës.

Arrestimi i tij është bërë për shkak se gjatë konfliktit ku mbeti i plagosur, ka pasur shkëmbim zjarri me Altin Marku, i cili po ashtu mbeti i plagosur.

Marku u arrestua disa orë pas ngjarjes nga Policia e Lezhës, teksa fshihej në banesën e një të afërmi të tij në Kallmet.

Nga hetimet paraprake pak minuta pas ngjarjes u dyshua se ishte një atentat ndaj zyrtarit, por nga hetimet rezultoi se gjatë konfliktit janë përdorur dy armë, dhe të dy personat e përfshirë kanë mbetur të plagosur.

Policia ka sekuestruar vetëm një nga dy armët që janë përdorur nga Simoni dhe Marku. Besnik Simoni mbante prej disa vitesh detyrën e administratorit të Kallmetit, dhe konflikti me Markun ka nisur shumë kohë më parë, për të vazhduar gjatë paradites së djeshme.

Pas një konflikti që kanë pasur në zyrën e Simonit, Marku ka qëlluar disa herë në drejtim të makinës së administratorit të Kallmetit, ndërsa edhe vetë ky i fundi është përgjigjur me armë.