Prokuroria ka kërkuar 18 vite burg për 60-vjeçarin Mhill Gega, i cili në muajin shkurt të këtij viti përplasi për vdekje me makinë bashkëfshatarin Mark Gjeta. Kërkesa ëshët depozituar në Gjykatë, e cila sot pritet të japë dënimin e Gegës me akuzën e vrasjes me dashje.
Kujtojmë se ngjarja e rëndë ndodhi më 17 shkurt në fshatin Bungaj të Mirditës. Një konflikt i hershëm mes dy palëve, Mhill Gega dhe Mark Gjeta përfundoi me vdekjne tragjike të këtij të fundit.
Pas sherrit verbal, 60-vjeçari shkoi në shtëpi, mori makinën e tij dhe doli të shtypte bashkëfshatarin. Goditjet nga mjeti i shkaktuar vdekjen 68-vjeçarit dhe autori u vu në pranga. Para grupit hetimor, Gega ka deklaruar se viktima e ofendonte shumë shpesh në sy të familjarëve e të njohurve të tij.
Theksojmë sërish se sot pritet që trupi gjykues të shqyrtojë versionin e Prokurorisë dhe më pas të japë vendimin final.
