Fernando Santos është prezantuar si trajneri i ri i skuadrës së Beshiktashit.
Portugezi 69-vjeçar më parë ka drejtuar kombëtaren e Polonisë, por u shkarkua pas humbjes me Shqipërinë, me ekipin që dështoi të kualifikohej në Euro 2024.
Tekniku tregoi emocionet për detyrën e re në konfencën për shtyp.
“Ka shumë ngjashmëri me atdheun tim, Portugalinë, e të jem në Stamboll është domethënëse për mua. Është një qytet fantastik, e Turqia gjithasthu, e kjo ishte një nga arsyet kryesore që pranova të firmosja. Kam shumë dëshirë dhe i vendosur që të bëjë gjëra të mira te Beshiktashi”, tha tekniku portugez.
Santos ka qenë edhe në stolin e Portugalisë, por u largua pas humbjes në Katar 2022 nga Maroku. Me luzitanët ai fitoi Euro 2016. Santos, i cili ka drejtuar më parë edhe Porton, Sportingun, Benfikën dhe Greqinë, do të zëvendësojë Riza Calimbay te bardhezinjtë.
Presidenti i Besiktas, Hasan Arat tha se tifozët e klubit janë të paduruar për ditë të lavdishme. Skuadra nga Stambolli gjendet në vendin e gjashtë me 29 pikë nga 18 ndeshje në Superligën turke.
Discussion about this post