Pas takimit me kryeministrin Albin Kurti, përfaqësuesi Special i Bashkimit Evropian për dialogun Kosovë-Serbi, Miroslav Lajçak, i cili ndodhet në Kosovë, është takuar edhe me zëvendëskryeministrin Besnik Bislimin.
Nëpërmjet një statusi në Twiter, Lajçak bëri të ditur se ka biseduar për hapat e mëtutjeshëm rreth procesit të dialogut.
“Me Zëvendëskryeministrin e Parë dhe kryenegociatorin e Kosovës Besnik Bislimi, kisha një diskutim të thelluar për takimin e javës së kaluar në Bruksel dhe rreth përgatitjes për hapat e ardhshëm të procesit të Dialogut” – ka shkruar Lajçak.
Ndërkohë nesër pritet të takohet me kryeparlamentarin Glauk Konjufca, e po ashtu me shefat e grupeve parlamentare e me përfaqësues të OJQ-ve. Diplomati sllovak ndodhet për vizitë treditore në Kosovë gjatë së cilës ai do të takohet edhe me zyrtarë të tjerë të lartë të vendit.
