Pas gati tetë orësh, kryebashkiaku i Tiranës Erion Veliaj ka lënë ambientet e Prokurorisë së Posaçme, duke u shprehur se “ndihet i lehtësuar” pas shpjegimeve të dhëna për “kolegët hetues”.
Në dalje nga SPAK, Veliaj dha një deklaratë të shkurtër për mediat. Ai u kërkoi gazetarëve të mbajë fillimisht një prononcim dhe shtoi se më pas do të pranojë pyetjet e tyre. Megjithatë, pasi mbaroi fjalimin, nuk pranoi pyetjet e gazetarëve, duke u larguar.
Veliaj i quajti hetuesit “koleget e SPAK-ut”, ndërsa theksoi se ishte në Prokurorinë e Posaçme si bashkëpunëtor për çështjen e inceneratorit të Tiranës.
“Isha këtu si bashkëpunëtor.Kisha kohë që kisha kërkuar një takim. Po diskutonim sot orën 9 me 10 pasi kishte edhe një seancë tjetër. Patëm një ezaurim total të çështjes së inceneratorëve, të gjithë shpjegimet e nevojshme për mënyrën se ku dallon projekti i IFC-së, i cili u rrëzua dhe ishte nisur nga ish-bashkia me 37 euro/toni dhe që kjo ishte krejtësisht diçka tjetër e pa kërkuar nga investitorë të tjerë që s’kishin lidhje me bashkinë dhe as IFC. Sigurisht që u thanë edhe disa detaje të tjera. Të dy kolegët hetues më kanë kërkuar që për çështje të hetimit dhe sekretit hetimor dhe çështje etike, pasi bashkia Tiranë ka sjellë edhe disa prova të tjera, të mos i ndaj me gazetarët. Sigurisht do jetë pjesë e zbardhjes së dëshmisë time“, tha Veliaj.
“Ndihem vërtetë mirë që unë dhe ata që më duan ndihën më të lehtësuar. Unë ndihem më i lehtësuar se pata edhe unë mundësin më në fund të them fjalën time. Armiqtë e mi gjithashtu ndihen më të lehtësuar, se unë besoj se një njeri duhet gjykuar edhe nga armiqtë që bën jo vetëm nga punët që bëjmë. Duke qenë se respektoj ata që më kanë zgjedhur çdo koment tjetër do t’ua jap mbas mbledhjes së këshillit bashkiak“, shtoi ai, duke shmangur pyetjet e gazetarëve.
Lexo edhe:
Veliaj në mbledhjen e Këshillit Bashkiak: Dola nga SPAK me një ndjesi krenarie
Veliaj sulmon mediat: SPAK-u, një organizatë e disiplinuar e PS-së
Discussion about this post