Pas ngjarjes tragjike të 6 tetorit, ku gjyqtari Astrit Kalaja u vra brenda sallës së gjyqit në Tiranë, Gjykata e Apelit ka reaguar me një lëvizje të pazakontë, shpalljen e një vendi të lirë pune për një punonjëse sigurie, duke specifikuar që pozicioni duhet të plotësohet nga një grua.
Ky vendim vjen në një moment kur sistemi gjyqësor është nën presion për të rishikuar masat e sigurisë në ambientet e tij. Vrasja e gjyqtarit Kalaja, e kryer nga Elvis Shkambi menjëherë pas shpalljes së vendimit në një çështje pronësie, tronditi jo vetëm institucionin e drejtësisë, por edhe opinionin publik.
Autori qëlloi me tre plumba ndaj gjyqtarit dhe më pas ndaj palës kundërshtare, Ragip dhe Ervis Kurtaj, duke i plagosur të dy. Pas krimit, ai iu dorëzua policisë në dalje të gjykatës.
Në pranga përfundoi edhe Banush Koxhaj, punonjës sigurie në Gjykatën e Apelit Tiranë, i cili sipas policisë nuk mori asnjë masë për të kontrolluar fizikisht Elvis dhe Gjon Shkambin, pavarësisht se skaneri sinjalizoi praninë e metaleve në momentin e hyrjes së tyre.
Discussion about this post