Në Stacionin Kufitar të Kakavijës, gjatë ditëve të festës së Pashkëve, fluksi i lëvizjeve vijon të mbetet i lartë në të dyja anët e kufirit me Greqinë.
Sipas të dhënave, në 24 orët e fundit janë kontrolluar në total 10 076 shtetas, ku 6 838 kanë hyrë në territorin shqiptar dhe 3 238 kanë dalë. Gjatë të njëjtës periudhë janë regjistruar edhe 3 358 mjete, nga të cilat 2 411 në hyrje dhe 947 në dalje.
Në palën shqiptare, procedurat po kryhen përmes 4 sporteleve në hyrje dhe 2 në dalje, ndërsa në anën greke janë në funksion 3 sportele në hyrje dhe 3 në dalje. Ky raport po ndikon drejtpërdrejt në ritmin e qarkullimit, në një periudhë kur lëvizjet janë shtuar ndjeshëm për shkak të festave.
Burime nga kufiri bëjnë me dije se zgjatja e kohës së pritjes në sportelet greke lidhet me zbatimin e rregullave të reja të kontrollit për hyrjen në zonën Shengen Area. Këto procedura të reja kanë sjellë ngadalësim të përpunimit në palën greke të Kakavijës, duke shkaktuar radhë dhe vonesa më të gjata se zakonisht.
Deri më tani, fluksi mbetet i përqendruar kryesisht në hyrje, duke reflektuar lëvizjen e shtuar të emigrantëve dhe udhëtarëve që kthehen në vend për festat.
Discussion about this post