Edi Rama ka prezantuar ditën e sotme Erion Braçen para strukturave të PS-së si drejtues në njësinë numër 5 në Tiranë, e njohur ndryshe si “Stalingradi” i socialistëve.
Takimi është mbajtur tek “Art Turbina”, ku veç Ramës dhe Braçes, të pranishëm kanë qenë dhe Erion Veliaj, Delina Ibrahimaj dhe Ogerta Manastirliu, të deleguar po ashtu në Tiranë për zgjedhjet parlamentare të 11 Majit.
Vendimi për ta sjellë Braçen në Tiranë është marrë, pasi Belinda Balluku si drejtuese e PS-së për Qarkun e Fierit vendosi ta “dëbonte” nga Divjaka, ku ai e mbulonte si zonë prej vitesh.
Gjatë një interviste televizive, Braçe ka deklaruar se e larguan nga Divjaka pa dëshirën e tij dhe se lajmin e kishte marrë vesh vetëm nga mediat.
Kauza që ka përdorur Erion Braçe në politika ka qenë mbështetja që ai pretendonte se iu jepte fermerëve dhe blegtorëve, edhe pse të braktisur prej vitesh nga socialistët, por tani që e sollën në mes të kryeqytetit nuk dihet se çfarë kauze do “shpikë” deputeti.
Më herët në njësinë numër 5 në Tiranë ka qenë si e deleguar Anila Denaj, por siç duket, Rama ka vendosur ta dërgojë këtë të fundit sërish në jug, pasi këtë fundjavë që kaloi, ajo ka qenë e pranishme në stadiumin e Butrintit në Sarandë.
Discussion about this post