Vetëm pak ditë pasi kryeministri Edi Rama e njoftoi të mbyllur nismën aq shumë të debatueshme të ‘Ballkanit të Hapur’, ai pritet të nisë turin e tij në rajon në kuadër të procesit të Berlinit.
Nuk dihet se çfarë do të kërkojë Rama nga krerët ballkanikë, do të shpjegojë arsyet e ‘dështimit’ të Ballaknit të Hapur”, për të cilën pati thenë se do të ekzistojë gjithmonë, pavarësisht nismave europiane siç është edhe ajo e Berlinit, apo kreu shqiptar do të kërkojë të marrë flamurin e procesit të Berlinit, ndonëse këtë flamur tashmë po e tundin vendet kryesore të BE-së.
Nëse gjatë takimeve me përfaqësuesit e Serbisë dhe Maqedonisë, kryeministri shqiptar do t’u flasë për të mirat tashmë të nismës së Berlinit, mbetet për t’u parë se çfarë do të kerkojë nga udhëheqja e Kosovës, të cilët kanë qenë prej fillimit kundër Ballkanit të Hapur dhe pro procesit të Berlinit.
Do të kërkojë falje për largpamësinë e krerëve të Kosovës, që e dinin prej momentit të parë edhe fundin e Ballkanit të Hapur, apo do të vazhdojë të reklamojë veten si lider ballkanik dhe më gjerë.
Nga burimet mësohet se kryeministri Rama do të zhvillojë vizitat e tij në datat 6 dhe 7 korrik në 5 vendet e Ballkanit ku do të takohet me krerët e shteteve përkatëse.
Mësohet se takimet do të mbahen në kuadër të procesit të Berlinit dhe vizitat do të jenë në Prishtinë, Beograd, Sarajevë, Podgoricë dhe Shkup.
Rama në një deklaratë për mediat të shtunën tha se nisma ‘Open Balkan’ e ka kryer misionin e saj dhe se tashmë vendet e Ballkanit duhet të fokusohen tek Procesi i Berlinit.
“Ballkani i Hapur ishte një iniciativë që lindi nga nevoja për ta shtyrë përpara Procesin e Berlinit dhe e ka kryer atë mision për të cilin lindi. Ne duhet të futemi me kokë tani në Procesin e Berlinit sepse e kemi këtë mundësi, e kemi Procesin e Berlinit në Tiranë.
Discussion about this post