Presidenti i Federatës Mbretërore Spanjolle të Futbollit, Luis Rubiales këtë të premte do të japë publikisht dorëheqjen nga posti më i lartë i fubtollit spanjoll. Rubiales është kthyer në personin më të urryer të Spanjës pas gjesteve skandaloze pas finales së Kupës së Botës për Femra ku ai puthi në buzë futbollisten Hermoso.
Një veprim që solli shumë reagime, nga bota e sportit e jo vetëm, me kryeministrin spanjoll, Pedro Sanchez që deklaroi se “ndjesa publike” me një video nuk mjafton për shfajësim. Këshilli i Lartë i Sportit vendosi të merrte në shqyrtim çështjen e tij duke hapur hetim, ashtu si edhe FIFA për sjellje të pahijshme.
I rrethuar nga të gjitha anët, ish-futbollisti (me një karrierë modeste) vendosi që të mblidhte për këtë të premte një Asamble të Jashtëzakonshme të RFEF, duke shpresuar që të gjente aty mbështetje. Por klubet me radhë filluan të deklaronin se nuk do të merrnin pjesë në këtë eveniment dhe kjo bëri praktikisht të qartë se ditët e tij në këtë institucion kishin mbaruar.
Mediat iberike kanë bërë të ditur se pas një mbledhje në të cilën ishin të pranishëm edhe pjesëtarë të tjerë të Komitetit Ekzekutiv të Federatës Mbretërore si dhe drejtues të lartë të saj, Rubiales ka vendosur që gjatë kësaj Asambleje të japë dorëheqjen nga detyra që mban.
Rubiales mori drejtimin e Federatës Spanjolle në vitin 2018, pas largimit nga drejtimi i saj i Angel Maria Vijar i cili ishte shkarkuar për abuzimet me postin. Ai u rizgjodh në vitin 2020 për një tjetër mandat.
Gjatë viteve në drejtim ai është përfshirë në shumë skandale si zhvendosja e Superkupës në Arabinë Saudite, bizneset me ish-barcelonistin Gerard Pique, udhëtimet në Nju Jork me paratë e RFEF apo edhe regjistrimet audio ku fyente klube si Atletico Madrid, Sevilla apo Villarreal.
Ai është edhe anëtar i Komiteti Ekzekutiv të UEFA-s, ku mban postin e zëvendëspresidentit të këtij institucioni, duke qenë një nga njerëzit më të afërt me Aleksander Çeferin, një tjetër personazh që ka tërhequr antipati të gjërë për “aksionet” e tij.
Discussion about this post