Pasi i ka burgosur liderët e opozitës, Sali Berishën dhe Ilir Metën, si dhe burgosi deputetin Ervin Salianji, vetëm se i prishi imazhin Qeverisë duke denoncuar Geron Xhafajn, vëllain trafikant droge të ish-ministrit Fatmir Xhafaj, pasi çdo javë çon për ndjekje penale grupin parlamentar të PD, kryeministri Edi Rama u shpreh se është i gatshëm për dialog, por nuk ka me kë të flasë se nuk do opozita.
Rama deklaroi se opozita ka zgjedhur vetë që të përjashtohet, edhe pse ishin deputetët e mazhorancës i përjashtuan ata të opozitës me nga 60 ditë nga aktivitetet parlamentare bazuar në një rregullore të miratuar vetëm me kartonat e mazhorancës.
Kreu i qeverisë deklaroi se opozita ka zgjedhur që të vrasë veten politikisht dhe ai nuk e ndalon dot këtë gjë legjitime.
“Problemi është që kur duhet të vallëzosh, duhen dy vetë. Dhe nuk hidhet vallja nëse të dy nuk duan ta hedhin vallen. Kush është për dialog sot, është shumë e thjeshtë. Kush është i gatshëm të flasë. Kush nuk është për dialog është shumë e thjeshtë, kush nuk është i gatshëm të flasë”, tha Rama në një konferencë për mediat.
“Ndjehen të përjashtuar, më vjen shumë keq, është vetëpërjashtim absolut pa asnjë bazë faktike të lidhur me qëndrimet tonë. Është zgjedhja e tyre legjitime. Jemi vend i lirë, demokratik, secili bën zgjedhjen e vet. Edhe zgjedhja për të vrarë veten… politikisht, është legjitime, nuk e ndalojmë dot.
Kur ishim ne në opozitë, dërgonim letra për të folur, por nuk kemi marrë asnjë përgjigje. Ndërkohë që tani situata është ndryshe. Por diskutimet bëhen përmjet gjuhës, jo përmes krahëve, këmbëve, gjokseve. Kjo është shumë e thjeshtë”, u shpreh ai gjatë konferencës së përbashkët me ambasadorin e BE-së, Silvio Gonzato.
Discussion about this post