Në pak javë, Ministri Blendi Gonxhe, përmes Operatorit të Blerjeve të Përqendruara, jep rreth 3 milionë euro vetëm për larjen e çarçafëve dhe jorganëve në Spitalin e Traumës. Kështu, pasi ka marrë kontrata shumëvjeçare për lavanderitë e spitaleve në Elbasan, Vlorë, dhe Tiranë, Kristinka Leka hodhi në dorë edhe Spitalin Ushtarak.
Në listën e kontratave të parashikuara për në vijim është regjistruar edhe tenderi me objekt ‘Kryerja e shërbimit të lavanderisë për një periudhë 36 mujore në Spitalin Universitar te Traumës’. Sipas të dhënave, regjistrimi i planit për këtë tender është bërë më datë 21 nëntor 2024, ndërsa pritet të zhvillohet përgjatë muajit dhjetor.
Konkretisht ky tender përfshin larjen e çarçafëve, në seksionin e pastrimit kimik kur është nevoja, si dhe tharjen e tyre. Për këto shërbime fituesi do të paguhet 730 milionë lekë, ndërsa kontratat do të zgjasë për 3 vjet.
Për një periudhë 3 -vjeçare këto shërbime edhe mund të justifikohen, por jo në rastin konkret.
Në fillim të muajit nëntor 2024, Operatori i Gonxhes tenderoi shpenzimin 2.2 milionë euro për lavanterinë e këtij spitali, për të njëjtën periudhë kohore 3 vjet.
Kështu që me këtë shtesë që po i bëhet porosisë për larjen e çarçafëve në vitet në vazhdim, nga sigurimet shëndetësore dhe nga buxheti i shtetit do të paguhen rreth 3 milionë euro.
Nuk dihet se për kë është piketuar prokurimi i fundit, por ai i pari ju dha firmës ABI’S SHPK” apo ish-“DEVIS SHPK”, e cila aktualisht figuron në pronësi të Kristinka Lekës. Ne e denoncuam prokurimin, kur ngritëm zërin dhe pikëpyetjet se si Gonxhe i jep 2.2 milionë euro një kompanie që më parë ka mashtruar Spitalin e Traumës, nuk i ka paguar detyrimin rreth 60 milionë lekësh. Për më tepër, Spitali i Traumës është në gjyq me këtë kompani.
Një tjetër fakt, që na shtyn të mendojmë se edhe këtë tender do ta fitojë Leka është se, firma e saj ka përfituar tenderët e lavanderisë për disa spitale gjatë 2024, ku secili zgjat 2 deri në 3 vite.
1.8 milionë euro i mori për Spitalin e Vlorës në shtator, po në të njëjtin muaj iu dhanë 3.1 milionë euro për lavanterinë në Spitalin Psikiatrik në Elbasan, si dhe 2.2 milionë euro që i mori në fillim të nëntorit nga Spitali i Traumës.
Nuk e dimë se si i jepen këto kontratat nga autoritete të ndryshme Lekës, edhe pse kompania e saj është e përfshirë në kontratat të tjera njëkohësisht. Por, Gonxhe dhe Operatori i Blerjeve të Përqendruara, që është në varësi të ministrisë së tij duket sikur nuk shqetësohen nga pasojat e shkeljes së ligjit.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post